Qaraǵandyda sý aǵyzyp áketken aǵaıyndy jigitterdi tikushaqpen izdep jatyr
QARAǴANDY. QazAqparat - Qaraǵandy oblysy Qarqaraly aýdany Qopa ózeni mańyndaǵy sý tasqyny kezinde iz-túzsiz joǵalǵan aǵaıyndy jigitterdi izdeýge tikushaq berildi, dep habarlaıdy «QazAqparat» HAA tilshisi.
Qaraǵandy oblysy TJ departamenti basshysynyń orynbasary Murat Qatpanovtyń habarlaýynsha, erigen qar sýlarynan Qopa ózeniniń sýy arnasynan asyp ketken.
«Qopa ózeniniń arnasy tikushaqpen tekserildi. Oqıǵa ornynda qutqarýshylar jumys isteýde, eki tehnıka jáne tirkemesi bar qaıyq berildi. Qardyń erýinen ózen ulǵaıa tústi, aǵyn kúsheıdi, sol sebepti izdeý jumystary asa kúrdeli jaǵdaıda ótýde», - dep habarlady Qaraǵandy oblysy TJ departamentiniń baspasóz qyzmeti.
Er adamdar eldi mekennen tys, Jarly keńsharynan 500 metr jerde joǵalǵan. Ekinshi sáýir kúni tańerteń olar kópir arqyly bir úıir jylqynyń sońynan ketken. Qaıtar jolda salt atty eki aǵaıyndy Qopa ózeni mańynan ótken. Olarmen birge bolǵan jergilikti turǵyn joǵalǵan ekeýdiń attarymen birge ózenge qulaǵanyn, attardyń jaǵaǵa shyǵyp, er adamdardyń sýǵa aǵyp ketkenin aıtqan.
