Qaraǵandyda stýdentter arasynda oblystyq onlaın spartakıada bastaldy

QARAǴANDY. QazAqparat – Qaraǵandyda oblys ákiminiń júldesine stýdent jastar arasynda HV onlaın spartakıada bastaldy. Dene shynyqtyrý jáne sport basqarmasy uıymdastyrǵan sporttyq shara Qazaqstan Respýblıkasy Táýelsizdiginiń 30 jyldyǵyna arnalǵan, dep habarlaıdy QazAqparat tilshisi.

Jarys 22-28 aqpan aralyǵynda ótedi. Jeke jáne komandalyq birinshilik josparlanǵan. Oblystyń segiz joǵary oqý ornynyń árqaısysynan 43 qatysýshy óner kórsetedi. Jarys formatyna baılanysty komandalyq oıyndardan bas tartýǵa týra keldi.

«Pandemııaǵa baılanysty biz basketbol men voleıboldan jarys ótkize almaımyz. Barlyǵy segiz sport túri bolady: shańǵy jarysy, gir sporty, jeńil atletıka, doıby, toǵyzqumalaq, asyq atý, konkımen júgirý sporty, prezıdenttik kópsaıys. Spartakıadanyń barlyq túrleri bizge sporttyq sharany onlaın rejıminde ótkizýge múmkindik beredi», - dedi spartakıadanyń bas tóreshisi Nurlan Túsipov.

Jalpy komandalyq synaqtyń jeńimpazdary men júldegerleri E. Bóketov atyndaǵy Qaraǵandy ýnıversıtetiniń kýbogymen, dıplom jáne baǵaly syılyqtarmen marapattalady. Ár sport túri boıynsha alǵashqy úsh oryn alǵan komanda qatysýshylaryna gramota men medal tapsyrylady.

«Men jeńil atletıkadan jarysqa qatysamyn. Men oqyp jatqan E. A. Bóketov atyndaǵy ýnıversıtettiń stýdentteri osy oqý ordasyna 11 ret jeńis alyp keldi. Osyndaı sport jarysyna qatysý múmkindigi úshin uıymdastyrýshylarǵa alǵys aıtamyn. Bizdiń JOO bul joly da birinshi bolady dep úmittenemin», - dep bólisti jarysqa qatysýshy Laýra Jánibekova.