Qaraǵandyda stomatologııada qyzdyń qaza tabýyna qatysty is toqtatyldy
ASTANA. QazAqparat - Qaraǵandy stomatologııasynda qyzdyń qaza tabýy týraly qylmystyq is qaladaǵy Qazybek bı aýdandyq sotynyń sheshimimen toqtatyldy, dep habarlaıdy QazAqparat.
Sottyń aqparaty boıynsha, stomatologııa dırektory QR Qylmystyq kodeksiniń «Zańsyz medıtsınalyq jáne farmatsevtıkalyq qyzmet» baby boıynsha aıyptaldy.
2016 jyly qyz ata-anasymen birge Jezqazǵannan Qaraǵandy stomatologııalyq klınıkasyna kelgen. Ata-anasynyń qatysýymen oǵan narkoz berilgen. Dáriger onyń eki tisin emdegen. Osy kezde dáriger-anestezıolog naýqastyń denesiniń túsi ózgergenin jáne júreginiń toqtap qalǵanyn baıqaǵan. Dárigerler reanımatsııalyq is-sharalar júrgizip, jedel járdem shaqyrǵan. Onyń júregi soǵyp, qaıta dem ala bastaǵan. Tis dárigeri preparatsııalanǵan tisterin plombamen japqan. Biraq, onyń júregi qaıta toqtap, tynys almaı qalǵan. Júrgizilgen reanımatsııalyq is-sharalar nátıje bermegen. Dárigerler onyń qaza tapqanyn aıtqan.
Qyzdyń ákesi aıtqandaı, bala kishkentaı kúninen múgedek bolǵan. Oǵan týǵan kezden bastap «Balalardyń tserebraldyq sal aýrýy» dıagnozy qoıylǵan.
«Ákesi aıyptalýshydan 500 myń teńge materıaldyq jáne 10 mıllıon teńge moraldyq zalaldy óndirip alý týraly aryzynan bas tartyp, qazirgi tańda oǵan eshqandaı kiná artpaıtynyn málimdedi», - delingen sottyń habarlamasynda.
Sottalýshyǵa raqymshylyq jasalyp, qylmystyq jaýaptan bosatyldy.
