Qaraǵandyda sportshylar GGG belgisin beınelep sap túzedi
QARAǴANDY. QazAqparat - Qaraǵandyda ótken fleshmob barysynda sportshylar tanymal qazaqstandyq boksshy Gennadıı Golovkınniń brendi «GGG» belgisi boıynsha sap túzedi, dep habarlaıdy QazAqparat.
300-ge jýyq sportshylar, bapkerler, sport mektepteriniń dırektorlary Qaraǵandydaǵy Dostyq úıiniń aldynda Gennadıı Golovkınniń brendi «GGG» áripterin beınelep, sap qurdy. Osy áreketteri arqyly olar Gennadıı Golovkınge amerıkalyq Danıel Djeıkobspen bolatyn kezdesýiniń aldynda qoldaý kórsetti. Jekpe-jek Nıý-Iorktegi Madison Square Garden arenasynda ótedi.
Golovkın-Djeıkobs kezdesýi Astana ýaqyty boıynsha saǵat 8-00-de taratyla bastalady. Ánshi Marat Bekishev sportshyny qoldap, án saldy.
«Qazaqstandyqtardyń barlyǵy Gennadıı Golovkınniń jeńisine senedi. Biz onyń osy joly da jeńiske jetip, óziniń eń myqty boksshy ekendigin dáleldeýine tilektespiz»,-dedi Marat Bekishov sahnada turyp.
