Qaraǵandyda sottalǵan azamattardyń shyǵarmashylyq jumystarynyń kórmesi ótip jatyr
QARAǴANDY. QazAqparat - Qaraǵandy oblystyq beıneleý óneri murajaıynda bas bostandyǵynan aıyrý mekemelerinde jazasyn ótep jatqandardyń shyǵarmashylyq jumystarynyń kórmesi ashyldy. «Úmit-2019» kórme-baıqaýy barysynda eń úzdik jumystar tańdalatyn bolady. Bul týraly Qaraǵandy oblystyq qylmystyq-atqarý júıesi departamentinen málim etti, dep habarlaıdy QazAqparat tilshisi.
Atalmysh baıqaý jyl saıyn ótkiziledi. Bıyl oǵan «Qaraǵandyǵa 85 jyl» atty taqyrypta oryndalǵan 70 týyndy iriktep alyndy.
«Munda kartınalar da, qoldanbaly óner buıymdary da usynylǵan. Bul baıqaý sottalǵan azamattarǵa óz talanttaryn ortaǵa salýǵa múmkindik beredi. Onyń nátıjesi boıynsha alty júldeli oryn anyqtalady. Úzdik dep tanylǵan týyndylardyń avtorlaryna syılyqtar tabys etiledi», - deıdi QAJK departamenti tárbıe bóliminiń bastyǵy Erkebulan Qarǵaltaev.
Sottalǵan azamattardyń shyǵarmashylyq týyndylary arqyly olardyń ómirge degen kózqarasyn, oılary men qorshaǵan álemge degen qarym-qatynasyn kórýge bolady. Óner qylmys jasaǵan adamnyń ishki jan dúnıesiniń ózgerýine erekshe áser etedi. Ol týraly ónertanýshy, qazylar alqasynyń múshesi Natalıa Ivanına da atap ótti.
«Osy sekildi kórme-baıqaýlardyń tárbıelik mańyzy zor. Óner adamǵa oń jolǵa túsýge kómektesedi. Jyl ótken saıyn bul kórme qyzyqtyraq bolyp keledi. Avtorlar túrli tehnıkalardy qoldanyp, túrli materıaldarmen jumys jasaıdy. Munda kásibı stýdııalarda qoldanylmaıtyn zattar iske jaratylady. Mysaly, kómirden jasalǵan músinniń ózi bir keremet. Sonymen qatar avtorlar arasynda boıaýlardy ózderi jasaıtyndary da bar. Materıaldardy daıyndaýynyń ózi olardyń ónermen aınalysqysy keletinin kórsetedi. Mundaǵy árbir týyndy ózinshe erekshe», - deıdi Natalıa Ivanına.
Baıqaý qorytyndysy boıynsha stanoktik óner, qoldanbaly óner, beıneleý jáne grafıka nomınatsııalary boıynsha úzdik jumystar tańdalady. Kórme 19 maýsymǵa deıin jalǵasady. Keıinnen barlyq jumystar qarttar úıine tapsyrylady.
