Qaraǵandyda sottalǵan áıel 10 kitap oqyǵany úshin bostandyqqa shyqty

QARAǴANDY. QazAqparat – Qaraǵandy oblysy boıynsha QAJD AK-159/9 mekemesiniń sottalýshysy 10 ádebı shyǵarma oqyp, merzimin 3 jylǵa qysqartty, dep habarlaıdy QazAqparat tilshisi.

Qańtar aıynda Qaraǵandy oblysy boıynsha QAJD penıtentsıarlyq mekemelerinde «Sheksiz oqý» pılottyq jobasy iske qosyldy.

Ony ázirleýge Qaraǵandy oblysy boıynsha qylmystyq-atqarý júıesi departamenti, E.A. Bóketov atyndaǵy Qaraǵandy ýnıversıtetiniń orys tili men ádebıeti kafedrasynyń, qoǵamdyq-baqylaý komıssııasynyń jáne adam quqyqtary jónindegi qazaqstandyq Halyqaralyq bıýronyń qatysýymen oblystyq jáne mamandandyrylǵan prokýratýra qatysty.

Jobaǵa kóptegen sottalǵandar qatysty. «Sheksiz oqý» jobasy týraly bilgen bette, Lıdııa oǵan belsendi qatysa bastady.

Birneshe kórkem ádebıet janryndaǵy kitaptardy oqyp, ol shyǵarmalardyń mazmunyn aıtyp bergen.

Ol úshin Lıdııaǵa mekeme basshysy kótermeleý taǵaıyndaǵan.

Taǵy birneshe kitap oqyǵannan keıin sottalýshylarǵa ekinshi ret kótermeleý berildi.

Jalpy sany 10 kitapty oqyp, eki marapatqa ıe bolǵan Lıdııa shartty túrde merziminen buryn bosatyldy.

Áıel salyq tóleýden jaltarǵany úshin bes jyl merzimge sottalǵan, onyń eki jylyn Qaraǵandy oblysynyń áıelder kolonııasynda ótegen.

«Bizdiń mekemede «Sheksiz oqý» pılottyq jobasy júzege asyp jatyr. Oǵan 50-den astam sottalǵan qatysady. Jobaǵa alǵashqy qatysqandardyń biri yntalandyrý aldy jáne búgin shartty túrde merziminen buryn bosady», - dep habarlady AK-159/9 mekemesi bastyǵynyń orynbasary, ádilet podpolkovnıgi Nazıra Kádirova.