Qaraǵandyda Soltústik-Shyǵys aınalma joly resmı túrde ashyldy
QARAǴANDY. QazAqparat – Qaraǵandy oblysynyń ortalyǵynda Soltústik-Shyǵys aınalma joly resmı túrde ashyldy, dep habarlaıdy QazAqparat tilshisi.
Úlken júk kólikteri endi Qaraǵandydaǵy ortalyq kósheniń joldaryn tozdyrmaıtyn bolady. Qalanyń negizi qalanǵan 85 jyldan keıin alǵash ret aınalma jol salyndy.
Jańa jol Qaraǵandyny aınalyp ótip, qalany tranzıttik avtomobılder men úlken júkterden jeńildetýge múmkindik beredi. Ortalyq arqyly kúnine 22 myńǵa jýyq kólik ótedi.
Qurylys «Nurly jol» ınfraqurylymdyq damý memlekettik baǵdarlamasy boıynsha «Ortalyq-Ońtústik» dálizin qaıta jańartý josparyna endi.
Jol tórt jolaqty, asfaltbetondy jabyny bar. Jol jabynynyń birinshi jóndeýge deıingi qyzmet merzimi - 15 jyl. Qozǵalys qaýipsizdigin qamtamasyz etý úshin jolaqtar arasynda ırek bileý ornatyldy.
Eseptik jyldamdyq - saǵatyna 120 shaqyrym.
«Soltústik jáne Shyǵys aınalma joldardyń oblys úshin strategııalyq mańyzy bar. Sebebi jobalardy iske asyrý qala kóshelerine túsetin júktemeni aıtarlyqtaı tómendetedi, joldardyń tozýyn azaıtýǵa, apattylyqtyń tómendeýine jáne ekologııalyq jaǵdaıdyń jaqsarýyna septigin tıgizedi. Sondaı-aq, oblys ortalyǵyn Qazaqstannyń ońtústik óńirlerimen kólik baılanysymen qamtamasyz etedi», - dep atap ótti Qaraǵandy oblysynyń ákimi Jeńis Qasymbek.
Joba Qaraǵandy, Nur-Sultan, Pavlodar jáne Shyǵys Qazaqstan oblystary baǵyttary boıynsha jeti kólik aıyrymyn qarastyrady.
Aınalma joldardy qaıta qurý aıasynda jeti jol aıryǵy, toǵyz jol ótpesi, Soqyr ózeni arqyly ótetin kópir jáne demalys úshin eki alań salyndy.
