Qaraǵandyda Solonıchkı aýylyna baratyn jol bıyl jóndeledi
QARAǴANDY. Qazaqparat - Qaraǵandy Ákimi Nurlan Áýbákirov óziniń halyqqa esep berý kezdesýin bastady. Ol eń aldymen Oktıabr aýdanynyń turǵyndarynyń shaǵymdary men usynystaryn tyńdady, dep habarlaıdy QazAqparat tilshisi.
Esep berý kezdesýi Qaraǵandy oblysynyń ákimi Erlan Qoshanovtyń óńir turǵyndaryn qalanyń 85 jyldyq mereıtoıymen quttyqtaýynan bastaldy. Aımaq basshysy oblys ortalyǵy turǵyndarynyń usynystary jáne shaǵymdarymen jeke tanysý úshin kezdesýge qatysty.
«Qaraǵandy - bizdiń basty qalamyz, onyń damýyna úlken kóńil bólinedi. Ótken jyly Memleket basshysy óńirge jumys sapary kezinde oblys ortalyǵyn odan ári damytý jóninde jeke tapsyrma bergen bolatyn. Bolashaqta Qaraǵandy mıllıoner qala bolýy kerek. Biz strategııany ázirledik, jospar qurdyq», - dedi aımaq basshysy.
Jańa ortalyq qurylysy boıynsha aýqymdy jobany iske asyrý bastaldy. Birinshi kezeń aıasynda 150 gektar jerde jańa shaǵyn aýdan salynbaq. Bolashaqta qurylys 1 000 gektardan astam aýmaqty qamtyp, Ońtústik-Shyǵysty Maıqudyqpen baılanystyrady dep josparlanýda.
Qala ákimi bıylǵy jyly Qaraǵandyda qandaı ózgerister bolatynyn aıtyp ótti. Jańa jobalardyń qatarynda ferrosılıtsıı shyǵaratyn zaýyt bar. Jobanyń quny 30 mlrd teńgeden asady jáne 500 jańa jumys orny ashylady.
Qurylys salasyna keler bolsaq, Qaraǵandyda bıylǵy jyly Baýyrjan Momyshuly atyndaǵy jańa shaǵyn aýdanda 1 200 oryndyq mektep ashylady. Sondaı-aq, 30-shy shaǵyn aýdanda osyndaı mekteptiń qurylysy júrgizilýde. Jańa ortalyqta Oqýshylar saraıynyń qurylysy bastalady.
Oktıabr aýdanynyń turǵyndary sheshýdi talap etetin máselelerimen ortaǵa saldy. Kezdesýge kelgen halyq balabaqshalardyń mańyn jaryqtandyrý, Suryptaý stansasyndaǵy saıabaqty abattandyrýdy jáne kógaldandyrýdy, qalanyń osy aýdanyna jolaýshylar kóliginiń kestesin ózgertýdi surady.
Solonıchkı aýylyna barar joldy jóndeý máselesi boıynsha oblys ákimi jaýap berdi.
«Solonıchkı turǵyndarynyń máseleleri týraly men bilemin. Sizdiń jerlesterińizdiń biri maǵan qabyldaýǵa keldi. Jalpy alǵanda, kentti damytý týraly suraqtar qoıyldy. Sol kezdesýden keıin jańa balalar alańy ornatyldy jáne taǵy da birqatar máseleler sheshildi. Jol jóndeýge bıyl bıýdjetten 248 mln teńge bólindi. Onyń uzyndyǵy - 9 shaqyrym. Kóktemde jumys bastalady», - dedi Erlan Qoshanov.
14 aqpanda Qaraǵandy qalasynyń ákimi Nurlan Áýbákirov Qazybek bı atyndaǵy aýdan turǵyndarymen ekinshi esep berý kezdesýin ótkizedi. Qala turǵyndaryn Qaraǵandy qalasy ákimdiginiń úlken zalyna shaqyrady. Kezdesý saǵat 15.00-de bastalady.
