Qaraǵandyda soǵys ardagerlerine 1 mln teńgeden kómek berilmek

QARAǴANDY. QzaAqparat – Qaraǵandyda Ekinshi dúnıejúzilik soǵystyń ardagerlerine 1 mln teńgeden bir rettik kómek berilmek, dep habarlaıdy QazAqparat tilshisi.

«Bıylǵy jyly Ekinshi dúnıejúzilik soǵystyń aıaqtalǵanyna 75 jyl tolady. Osyǵan oraı ótetin sharalar qazir jan-jaqty pysyqtalýda. Sonymen qatar, soǵys ardagerlerine 1 mıllıon teńge kóleminde bir jolǵy kómek qarajat beriledi», - dedi Qaraǵandy qalasy ishki saıasat bóliminiń basshysy Darhan Jıenbaev qala ákimdiginiń apparat keńesinde.

Sonymen qatar, ardagerlerge qamqorlyq kórsetý maqsatynda «Ardaǵym Ardagerim» aktsııasy jalǵasýda. Jastar arasynan volonterler tazalaý nemese jóndeý jumystaryn júrgizý, turmystyq máselelerdi sheshýge kómektesý úshin qart adamdardyń úılerine barady.

Aqpan aıynda Sovet áskerleriniń Aýǵanstannan shyǵarylǵanyna 31 jyl tolady. Bólim basshysynyń aıtýynsha, jaýynger-ınternatsıonalısterge 100 myń teńgeden materıaldyq kómek beriledi.

Búgingi tańda Qaraǵandyda Ekinshi dúnıejúzilik soǵysqa qatysqan 38 ardager turady. Sondaı-aq, 698 turǵyn Aýǵanstandaǵy soǵysqa qatysqan.