Qaraǵandyda sms arqyly til tıgizgen áıel kóshe jınaýǵa jazalandy
QARAǴANDY. QazAqparat - Qaraǵandy oblysynda SMS-hat almasý barysynda ar-namysqa tıetin sózder jazǵan áıel qoǵamdyq jumystar túrindegi jazaǵa sottaldy, dep habarlaıdy «QazAqparat» HAA tilshisi.
Óz atyna jiberilgen balaǵat sózderdi oqyǵan Osakarov aýdanynyń turǵyny jeke aıyptaý túrinde sotqa aryzdandy. Jala jabý, til tıgizý syndy ister boıynsha túsken jeke adamnyń aıyptaýy polıtsııada tirkelmesten avtomatty túrde qylmystyq is bolyp sanalatyny belgili.
Zardap shekken áıel ózin kemsitken ekinshi áıeldi QR QK-niń 131-baby 1-bóligi boıynsha («Til tıgizý») qylmystyq jaýapkershilikke tartýdy surady. Onymen qosa, ol aıyptalýshydan moraldyq shyǵyn retinde 100 myń teńge kóleminde ótemaqy óndirip alý týraly azamattyq talap-aryz túsirdi.
«Sot barysynda aıyptalýshy áıel telefonmen sms-hat almasý barysynda ádepsiz túrdegi sózdermen ózge tulǵanyń ar-namysyn qorlaý pıǵylymen zardap shegýshi áıelge til tıgizgeni anyqtaldy», - dep atap ótti Qaraǵandy oblysy Osakarovka aýdandyq sotynyń baspasóz qyzmetinen.
Sýdıa aıyptalýshyny kináli dep taýyp, oǵan 60 saǵatqa qoǵamdyq jumystarǵa tartý túrindegi jazany taǵaıyndady. Áıeldiń naqty qandaı jáne qaı jerdegi jumystardy oryndaıtynyn aýdan ákimdigi sheshetin bolady.
Azamattyq talap-aryz ishinara qanaǵattandyryldy. Sottalǵan aýyl turǵyny 15 myń teńge ótemaqy tóleıtin bolady.
