Qaraǵandyda Smart City tehnologııasy engizilip jatyr
ASTANA. QazAqparat - Smart City tehnologııasy Qaraǵandyda engizile bastady. Onyń arqasynda aldaǵy jyldary qala turǵynynyń árqaısysynda elektrondy densaýlyq pasporty, al mektep oqýshylarynda elektrondy kúndelikter bolady dep josparlanyp otyr, dep habarlaıdy QazAqparat ákimniń saıtyna silteme jasap.
Avtobýstaǵy tólemaqyny jolaýshylar qolma qol aqshasyz óteı alady, al qoǵamdyq tártipti kameralar men baǵdarlamalar qadaǵalaıdy, elektr jáne jylý qýatyn baqylap, kommýnaldyq tólemderdi kompıýterler esepteıtin bolady.
Sandyq júıege aýysýdyń keı elementteri qazirdiń ózinde oblysta engizilip jatyr. Mysaly, osy jyldyń sońyna deıin oblysymyzdyń densaýlyq saqtaý salasy tolyǵymen elektrondy formatqa aýysady, turǵyndarda elektrondy densaýlyq pasporty bolady. Qazirgi ýaqyttyń ózinde onlaın rejımde dáriger shaqyrtyp, saraptama nátıjelerin alyp, josparly dáriger qaraýyna shaqyrtý alýǵa jaǵdaı jasalǵan. Sonymen qatar Qaraǵandy oblysynyń bilim salasynda da «Bilim al» elektrondy kúndelikter júıesi sátti qyzmet etýde, ol ata-analarǵa balalarynyń baǵalaryn kórýge múmkindik beredi.
Qazir oblysymyzdyń bılik basyndaǵylaryavtoparktermen qoǵamdyq kólikterde tqlem termınaldary-valıdatorlardy ornatý týraly kelisimsóz jasap jatyr.
Buǵan qosa, qalamyzda jáne oblysta qosymqa baqylaý kameralaryn ornatý jospar bar. Olardan jınalǵan málimetterdi arnaıy baǵdarlama óńdep, quqyq qorǵaý organdaryna belgili bir oqıǵalarǵa shuǵyl áreket etýge jáne jasalǵan qylmysty jedel anyqtaýǵa kómegin tıgizedi.
«Bul jobany iske asyrýǵa biz bıznes-qurylymdardy jumyldyrýdy kózdep otyrmyz. Bıýdjet, jalǵyz ǵana qarjylandyrý kózi retinde, Smart City kontseptsııaly jobalarǵa osyndaı uzaq merzimdi ınvestıtsııalardy ózi jalǵyz kótere almaıdy. Sondyqtan, bizge uzaqmerzimdi qyzmetti satyp alýǵa múmkindik beretin MJS baǵdarlamasy boıynsha jumys jasaımyz. Bul sonymen qatar memlekettik bıýdjet úshin 10 jyl alǵa tehnıkalyq sheshimderdi qurý múmkin emes bolǵandyqtan óte qajet. Biraq naryqta 7-10 jylǵa deıin uzaqmerzimdi ınvestıtsııalar jasaýǵa qaýqarly iri kompanııalar bar. Osylaısha, biz aımaqtyq bıýdjetke zııan keltirmesten Smart City kontseptsııasynyń jobalaryn júzege asyra alatyn bolamyz», - dedi Qaraǵandy oblysy ákiminiń orynbasary Almas Aıdarov.
Aıta ketý kerek, bul kontseptsııaǵa sonymen qatar «Áleýmettik kartalar» da enedi.
