Qaraǵandyda sırek aýrýǵa shaldyqqan balalardyń arnaıy tamaǵyna 198 mln teńge bólinedi
Qaraǵandy oblysynda fenılketonýrııasy bar 13 bala turady. Aýrý amınqyshqyldarynyń almasýynyń buzylýyna, olardyń organızmde jınalýyna ákep soǵady, saldarynan mı zaqymdanýy múmkin.
Ýaqtyly emdemese, FKÝ aqyl-oıdyń tejelýine, qarysýlarǵa, minez-qulyq problemalaryna jáne psıhıkalyq buzylýlarǵa ákelýi múmkin.
Aýrý neonataldy skrınıng aıasynda anyqtalady, ol bala týylǵannan keıingi úshinshi kúni jasalady.
«Qan alynyp, bizdiń medıtsınalyq-genetıkalyq zerthanamyzǵa jiberiledi. Eger aýrýdyń bolýyna qatysty kúmándansańyz, biz test jasaımyz. Dıagnoz rastalǵan jaǵdaıda esepke alamyz. Fenılketonýrııa – emdelmeıtin aýrý. Mundaı balalarǵa arnalǵan jalǵyz emdeý – bul ómir boıy emdik tamaqtaný. Qajetti tamaqtanýdy balanyń osy nemese basqa qospany, qandaı da bir ónimdi aǵzasy qalaı qabyldaıtynyna baılanysty jeke tańdalady», – deıdi Qaraǵandy oblysy densaýlyq saqtaý basqarmasynyń shtattan tys bas genetıgi, m.ǵ.k. Janat Zavotpaeva.
Fenılketonýrııasy bar balalardyń ratsıonyna tek aqýyzy tómen taǵamdar kiredi. Ata-analar arnaıy qospalar, quramynda fenılalanın az jarma, makaron, sút almastyrǵyshtar jáne basqa ónimderdi memleket esebinen tegin alady.
Bıyl oblysta medıtsınalyq saqtandyrý qorynan FKÝ bar balalardy emdik tamaqtandyrýǵa 198 mıllıon teńge baǵyttalady.
«Biz aqsha aýdaramyz, al emhanalar qajetti mólsherde arnaıy tamaq satyp alady. Olar ádette qymbat bolady. Azyq-túlik ata-analarǵa genetık dárigerdiń taǵaıyndaýyna baılanysty beriledi», – dep túsindirdi medıtsınalyq saqtandyrý qorynyń Qaraǵandy fılıalynyń dırektory Fazyl Kopobaev.