Qaraǵandyda sımptomsyz patsıentter úshin «Týrıst», «Merıdıan» qonaq úıi qaıta jabdyqtaldy
QARAǴANDY. QazAqparat - Qaraǵandy emhanalarynyń basshylary COVID-19 indetin sımptomsyz tasymaldaýshylar qalaı baqylanatyny jáne juqtyrǵandar qandaı kórsetkishteri boıynsha aýrýhanaǵa jatqyzylatyny týraly onlaın rejımde ótken baspasóz máslıhatynda aıtyp berdi, dep habarlaıdy QazAqparat tilshisi.
Qazaqstanda 10 maýsymda koronavırýs ınfektsııasymen aýyrǵan adamdardy emdeý hattamalary men esepteý júıesi ózgertildi. Endi sımptomsyz vırýs tasymaldaýshylar resmı málimetterge engizilmeıdi jáne olar aýrýhanaǵa jatqyzylmaıdy. Bul gospıtalder men statsıonardaǵy dárigerlerdiń júktemesin tómendetýge kómektesedi. Aǵzasynda anyqtalǵan vırýs esh belgisiz ótip jatqan adamdardy emhanalardyń dárigerleri baqylaıdy.
«Sımptomsyz naýqastar COVID-19-ǵa PTR test jasaý kezinde anyqtalady. Mindetti túrde júkti áıelder, sozylmaly júrek-qan tamyrlary aýrýlary bar patsıentter, qant dıabetimen jáne tynys alý júıesiniń aýrýlarymen aýyratyn adamdardy tekseriledi. Sondaı-aq, testini buryn juqtyrǵandarmen jaqyn qarym-qatynasta bolǵan adamdar da tapsyrady», - dep túsindirdi Qaraǵandy oblysy Densaýlyq saqtaý basqarmasy basshysynyń orynbasary Gámal Toqsanbaev.
Eger PTR taldaý oń nátıje kórsetse, biraq sımptomdar bolmasa nemese olar álsiz bolsa, onda patsıentti úı karantınine ornalastyryp, emhanalardyń baqylaýyna alady.
«Biz KVI bar sımptomsyz naýqastardy baqylaıtyn arnaıy bólim qurdyq. Olarǵa dárigerler nemese orta medıtsınalyq qyzmetkerler qońyraý shalady. Kimmen qashan áńgime júrgizilgeni týraly, kimge dárigerdiń kómegi kerek ekenin bilip otyrý úshin patsıentter kún saıyn birneshe topqa bólinedi», - deıdi «Qaraǵandy qalasynyń №3 emhanasy» KMK dırektory Sánııa Boranqulova.
Keıbir patsıentterge qannyń ottegimen qanyǵý deńgeıin baqylaýǵa qabiletti arnaıy quraldar - pýlsoksımetrler ýaqytsha paıdalanýǵa tegin beriledi.
«Olardy qart adamdar, júrek-qantamyr júıesi, búırek, tynys alý júıesi, qant dıabeti jáne basqa da sozylmaly aýrýlary bar naýqastar alady. Biz patsıentterdi atalmysh quraldy durys paıdalanýdy úıretemiz, qandaı kórsetkishpen birden dárigerdi shaqyrý kerektigin túsindiremiz», - dedi Qaraǵandy №1 kópsalaly aýrýhanasy dırektorynyń orynbasary Radmıla Ǵabdyraqypova.
COVID-19 sımptomsyz tasymaldaýshylar úı karantıninde 14 kún ótkizedi. Keıin qaıtadan PTR-taldaý alynady. Eger ol teris nátıje berse, naýqas saýyǵyp ketti dep sanalady. Eger test patsıenttiń qanynda vırýstyń bolýyn rastasa, onda ol ári qaraı dárigerlerdiń baqylaýynda bolady.
Sımptomsyz vırýs tasymaldaýshylardy, eger olarmen birge zeınetkerler, júkti áıelder nemese balalar turatyn bolsa, emdeýge jatqyzýy múmkin. Mundaı patsıentter úshin arnaıy «Týrıst» jáne «Merıdıan» qonaq úıleri qaıta jabdyqtaldy.
