Qaraǵandyda shomylýǵa barǵan bir top jastardyń biri kóz jumdy

QARAǴANDY. QazAqparat – Qaraǵandy qalasynda 19 jastaǵy jigit Fedorov sý qoımasyna sýǵa batyp ketti. Bir top jastar tyıym salynǵan jerde shomylǵan, dep habarlaıdy QazAqparat tilshisi.

Qaıǵyly oqıǵa 6 maýsym kúni boldy. 2004 jyly týǵan jas jigit tyıym salynǵan jerde shomylý kezinde sýǵa batyp ketken. Oqıǵa týraly qutqarýshylarǵa marqummen birge demalysta bolǵan dostary habarlaǵan.

«Qutqarýshy-súńgýirler sýǵa batqan adamnyń denesin jaǵadan 8 metr qashyqtyqta, 3 metr tereńdikten tapty. Bul jerde sý qoımasynyń túbi birkelki emes, tereńdigi kúrt tómendeıdi. Tyıym salynǵan jerlerde sýǵa túsý ómirge qaýip tóndiredi!

Sýdyń bet jaǵyna qarap, qaýipti anyqtaý múmkin emes. Eger júzýge tyıym salatyn belgini kórseńizder, táýekel etpeńizder!», - dep eskertti qutqarýshylar.

Qaraǵandy oblysynyń TJD mamandary qaýipsizdik erejelerin taǵy bir márte eske saldy:

- eger júze almasańyz, belińizden joǵary sýǵa túspeńiz;

- balalardy qaraýsyz qaldyrmańyz;

- mas kúıde sýǵa túspeńiz;

- tanys emes jerlerde sýǵa túspeńiz;

- túnde sýǵa túspeńiz;

- sýǵa túsýge arnalmaǵan taqtaılardy jáne basqa zattardy qoldanbańyz;

- sýǵa túsý quraldaryna qutqarý keýdesheleri men belbeýsiz otyrýǵa bolmaıdy!