Qaraǵandyda sheteldik nómiri bar kólikterdi ýaqytsha tirkeý jumystary túsindirilip jatyr
QARAǴANDY. QazAqparat - Qaraǵandy oblysynda shet eldik nómiri bar 30-dan astam kólik ıeleri ýaqytsha tirkeý boıynsha keńes aldy. Alǵashqy tilek bildirýshiler de paıda boldy, dep habarlaıdy QazAqparat tilshisi.
EAEO elderinde turaqty esepte turǵan jáne Qazaqstanǵa aǵymdaǵy jyldyń 1 aqpanyna deıin ákelingen avtokólikterdi ýaqytsha tirkeý boıynsha jumys búgin Qaraǵandy oblysynyń mamandandyrylǵan HQKO-larynda bastaldy.
Saǵat 9.00-den bastap Ákimshilik polıtsııa basqarmasynyń qyzmetkerleri Memlekettik kirister departamentiniń qyzmetkerlerimen birlese otyryp, Reseı, Armenııa, Qyrǵyzstan jáne Belarýs elinen ákelingen avtokólik ıelerine kólikti ýaqytsha esepke alý nemese turaqty tirkeý qalaı júrgiziletinin túsindirdi. Anna Jaqsybekova ákimshilik polıtsııa basqarmasynyń bastyǵy Álibek Meıramovten kólikti tirkeý úshin qajetti qujattardyń tizimi týraly surady.
«Biz kúıeýim ekeýmiz 2016-shy jylǵy «Toyota camry 55« jáne 2008-shi jylǵy «Lexus« kólikterin Reseı Federatsııasynan satyp alǵan edik. Qazir elimizde ondaı avtokólikterdi turaqty esepke qoıý týraly sheshim qabyldandy. Maǵan mamandar birinshi kóligimdi turaqty esepke qoıyp, memlekettik baj salyǵyn tólep, alǵashqy tirkeýge qoıa alatynymdy aıtty. Al ekinshisi odan sál eskileý, sondyqtan men onymen halyqaralyq qozǵalys aıasynda júre bermekpin»,-dedi Anna Jaqsybekova.
Ol sondaı-aq búgin túsinikteme alyp, barlyq saýaldaryna mardymdy jaýap alǵanyn atap ótti.
Jalpy búgingi kúni 30 adam keńes aldy, onyń ishinde 20-y Reseı Federatsııasynyń, 8-i Armenııa Respýblıkasynyń jáne 2-ýi Qyrǵyzstan Respýblıkasynyń avtokólikterin tirkeý boıynsha suraqtaryna jaýap aldy.
Aıta ketý kerek, oblys aýmaǵynda azamattardy qabyldaý segiz HQO-da júzege asyryldy, bul Qaraǵandy qalasynyń mamandandyrylǵan HQO, Temirtaý, Jezqazǵan, Balqash qalalarynyń, sondaı-aq Abaı, Jańaarqa, Osakarov jáne Qarqaraly aýdandarynyń HQO-tary.
Joǵaryda kórsetilgen kólik quraldaryna qatysty túsindirý jáne ýaqytsha tirkeý jumystary 1 aqpannan 1 naýryzǵa deıin 9:00-den 18:00-ge deıin demalyssyz júzege asyrylady.
Sondaı-aq, 8-775-617-96-18, 8(7212) 55-87-06 jedel jeli telefondary jumys isteıdi.
