Qaraǵandyda sheneýnik memlekettik qyzmetpen qosa jeke bıznespen de aınalysqan
Sybaılas jemqorlyqqa qarsy qyzmet Qaraǵandy oblysynyń ónerkásip jáne ındýstrııalyq-ınnovatsııalyq damý basqarmasy basshysynyń orynbasary tarapynan kásipkerlik qyzmetke kedergi jasaý faktisin anyqtady.
«Kásiporyn keń taralǵan paıdaly qazbalardy óndirýge arnalǵan lıtsenzııanyń qoldanylý merziminiń aıaqtalýyna baılanysty atalǵan lıtsenzııanyń qoldanylý merzimin uzartý úshin basqarmaǵa júgingeni anyqtaldy. Kásiporyn qarjylyq jáne kelisimshart mindettemelerin tıisinshe oryndaǵan. Alaıda, Qaraǵandy oblysynyń ónerkásip jáne ındýstrııalyq-ınnovatsııalyq damý basqarmasy basshysynyń orynbasary kásiporynnyń tıisti qujattaryn uzartýdan sebepsiz bas tartqan», - dep habarlady Sybaılas jemqorlyqqa qarsy qyzmettiń baspasóz qyzmeti.
Sotta basqarma basshysynyń orynbasary óz áreketimen kásiporynnyń kásipkerlik qyzmetpen aınalysýyna naqty kedergi keltirgeni anyqtaldy.
Osyǵan baılanysty, ol kásipkerlik qyzmetke zańsyz aralasqany úshin Ákimshilik quqyq buzý týraly kodekstiń 173-baby boıynsha ákimshilik jaýapkershilikke tartyldy.
Sondaı-aq, Qaraǵandy oblysy boıynsha sybaılas jemqorlyqqa qarsy qyzmettiń mamandary RMK fılıalynyń basshysy kásipkerlik qyzmetpen aınalysqanyn anyqtady.
Ol óz atyna JK tirkep, JShS quryltaıshysy bola otyryp, qyzmet kórsetýge memlekettik satyp alý týraly shart jasasqan.
«RMK fılıalynyń basshysy kásipkerlik qyzmetpen aınalysqany úshin Ákimshilik quqyq buzý týraly kodekstiń 154-baby boıynsha ákimshilik jaýapkershilikke tartyldy. Aıyppul tolyq kólemde tólendi», - dep tolyqtyrdy sybaılas jemqorlyqqa qarsy qyzmet.
QR «Sybaılas jemqorlyqqa qarsy is-qımyl týraly» Zańyna sáıkes memlekettik fýnktsııalardy oryndaýǵa ýákilettik berilgen adamdarǵa teńestirilgen adamdarǵa pedagogıkalyq, ǵylymı jáne ózge de shyǵarmashylyq qyzmetten basqa aqyly qyzmetpen aınalysýǵa tyıym salynady.