Qaraǵandyda sheneýnik «Qoljetimdi baspana» úshin $5000 para alǵan
QARAǴANDY. QazAqparat - Qaraǵandyda 5000 dollarǵa «Qoljetimdi baspana» baǵdarlamasymen úı alyp beremin dep ýáde etken sheneýnik taraptardyń ortaq kelisimge kelýine baılanysty jaýapkershilikten qutylyp ketti, dep habarlaıdy QazAqparat.
Qaraǵandynyń Qazybek bı aýdany ákimdiginiń qyzmetkerine qyzmet babyn jeke múddesi úshin paıdalandy degen aıyp taǵyldy. Oǵan qatysty qylmystyq isti Qazybek bı aýdandyq soty qarady.
«QR QK 68 baby, 1 tarmaqshasyna sáıkes, qylmystyq is taraptardyń til tabysýyna balanysty toqtatyldy»,-dep habarlady aýdandyq sottyń baspasóz qyzmeti.
Qylmystyq istiń materıaldarynda «Qaraǵandy qalasy Qazybek bı aýdandyq ákimdigi» memlekettik mekemesiniń turmystyq qamtamasyz etý bólimi bas mamanynyń mindetin atqarýshy jergilikti turǵyndy aldap soqqandyǵy aıtylady.
Naqtyraq aıtqanda, sheneýnik 5000 dollar bergen jaǵdaıda «Qoljetimdi turǵyn úı-2020» baǵdarlamasy arqyly turǵynǵa úı alyp beretindigin jóninde jalǵan ýáde bergen. Memlekettik qyzmetker bul rette 5000 dollardy ózi almaıtynyn, ony laýazymdy tulǵalarǵa beretinin aıtqan. Alaıda alǵan aqshany ol jeke múddesin úshin jaratqan da turǵyn úı máselesi sheshilmegen kúıi qalǵan.
«Aıypty azamat shyǵyndy ótedi. Sóıtip, eki jaqtyń bir-birimen ortaq mámilege kelýine baılanysty is toqtatyldy»,-dep habarlady aýdandyq sot ókilderi.
Sot qaýlysy kúshine engen joq.
