Qaraǵandyda shalǵaı aýyl balalaryn mektepke tasymaldaý úshin 27 avtobýs satyp alynady

QARAǴANDY. QazAqparat – Qaraǵandy oblysynda aýyl mektepteri úshin 27 jańa avtobýs satyp alý josparlanǵan. Bul óz kezeginde mektebi joq shalǵaı eldi mekenderden balalardy tasymaldaý máselesin sheshýge kómektesedi, dep habarlaıdy QazAqparat tilshisi.

Aýyl mektepteriniń avtoparkin jyl sońyna deıin birtindep tolyqtyrý josparda bar.

Alǵashqy bes avtobýs 15 qyrkúıekke deıin Abaı, Buqar Jyraý jáne Qarqaraly aýdandarynyń mektepterine beriledi.

Ol úshin Qaraǵandy oblysynyń bilim basqarmasynyń basshylyǵy kólik qabyldaýǵa qatysty alǵashqy aktilerge qol qoıdy jáne qajetti qujattardy resimdeý jumysyn bastap ketti.

Qyrkúıek aıynyń sońyna deıin vedomstvo taǵy 14 avtobýsty satyp alyp, aýyldyq jerlerge beredi.

«Bilim mınıstrliginiń elimizdegi mektep avtoparkin jańartý jónindegi respýblıkalyq jobasy aıasynda lızıngtik qarjylandyrý esebinen 27 avtobýs satyp alyndy. «Ónerkásipti damytý qory» AQ men «Hyundai Trans Auto» JShS jáne «QazTehna» JShS jetkizýshileri arasynda shart jasaldy», – dep habarlady Qaraǵandy oblysy bilim basqarmasynyń basshysy Gúlsim Qojahmetova Facebook paraqshasynda.

Jańa avtobýstar zamanaýı talaptarǵa saı keledi.

Olar qaýipsizdik beldikterimen, mektep rıýkzaktaryna arnalǵan sórelermen, kóliktiń esigi ashyq qalyp qoıǵan kezde qozǵalysty buǵattaý mehanızmimen, jyldamdyqty saǵatyna 60 km-ge deıin ǵana jetkizetin shektegishpen jabdyqtalǵan.

Jańa oqý jylynda óńirde mektebi joq 121 shalǵaı eldi mekenniń 1628 oqýshysy bilim mekemelerine kún saıyn jáne apta saıyn jetkiziledi.