Qaraǵandyda shaǵyn nesıe uıymynyń kassırin órtep jibermekshi bolǵan qaraqshylar ustaldy
QARAǴANDY. QazAqparat – Qaraǵandyda shaǵyn nesıe uıymynyń kassırin órtep jiberemin dep qorqytyp, qaraqshylyq jasaǵan kúdiktiler ustaldy. Eki jigit kassanyń aldyna kelip, uıym qyzmetkerine benzın quıyp jiberip, kassadaǵy aqshany urlap ketken bolatyn, dep habarlaıdy QazAqparat tilshisi.
Eske sala keteıik, 9 aqpanda Qaraǵandyda belgisiz eki azamat shaǵyn nesıe berý uıymdarynyń birine qaraqshylyq shabýyl jasaǵan bolatyn. Kassırge benzın quıyp, olar úı-jaıdy órtep jiberemiz dep qorqytyp, kassadaǵy aqshany ıemdengen bolatyn. Oqıǵadan keıin dereý Qaraǵandy oblysy PD tájirıbeli qyzmetkerlerinen jedel top quryldy. Bir kúnnen keıin kúdiktiler ustaldy.
«Jedel-izdestirý sharalary barysynda krımınaldyq polıtsııa qyzmetkerleri 19 jáne 28 jastaǵy eki kúdiktini ustady. Olar qylmysyn moıyndady. Sotqa deıingi tergeý amaldary júrgizilýde», - dedi Qaraǵandy oblysy polıtsııa departamentiniń bastyǵy Erlan Faızýllın.
