Qaraǵandyda sendvıchten ishek taıaqshasy tabyldy
QARAǴANDY. QazAqparat - Qaraǵandy oblystyq qoǵam densaýlyǵyn saqtaý departamenti óńirdegi azyq-túlik ónimderine saraptama júrgizdi. Sońǵy bes aı boıy saýda nysandarynda júrgizilgen zertteý ónimderdiń 14 paıyzynyń talaptarǵa saı kelmeıtinin anyqtady, dep habarlaıdy QazAqparat tilshisi.
«Saraptama nátıjesi boıynsha, Bazylbekov M.G. jeke kásipkerliginiń shyǵarǵan ónimderi talapqa saı bolmaı shyqqan. Túrli saýda nysandarynan alynǵan sendvıchterdiń úsh synamasynan ishek taıaqshalary men mıkrobtar tabylǵan. Tekserý barysynda Bazylbekov M.G. jeke kásipkerligi kórsetilgen mekenjaıda joq bolyp shyqty. Sondaı-aq, qoldanystaǵy zańnamaǵa sáıkes, kásiporyn óz qyzmetin bastaǵany týraly aýmaqtyq qoǵam densaýlyǵyn saqtaý basqarmasyna eskertpegen. Atalmysh fakti boıynsha materıaldar Qaraǵandy qalalyq ІІB-ge joldandy», - dep habarlady oblystyq qoǵam densaýlyǵyn saqtaý departamentiniń baspasóz qyzmeti.
Departament otandyq jáne basqa elderden ákelinetin ónimderdiń tehnıkalyq reglamentterge jáne gıgıenalyq normatıv talaptaryna sáıkestigi boıynsha zertteýler júrgizdi.
Vedomstvoda málim etkendeı, talaptarǵa sáıkes kelmeıtin azyq-túlik ónimderiniń negizgi úlesi et ónimderine (32,9%) tıesili. Al, qus ónimderi - 16,8%, balyq ónimderi - 14,9%, sút ónimderi - 12,2%, kondıterlik ónimder - 6,8% , unnan jasalǵan ónimder - 3%, aspazdyq ónimder - 3,4%, maı ónimderi - 2,2%, basqa ónimder - 7,8%-dy quraǵan.
