Qaraǵandyda saılaý komıssııasy múshesi úgit-nasıhat materıalyn taratýmen aınalysqan

ASTANA. QazAqparat – Qaraǵandy oblysynda ýchaskelik saılaý komıssııasynyń múshesi úgit-nasıhat materıalyn taratýmen aınalysqan. Al buǵan zań boıynsha tyıym salynady. Bul týraly Bas prokýrordyń orynbasary Jandos Ómirálıev málim etti, dep habarlaıdy QazAqparat tilshisi.

«Saılaýaldy naýqan barysynda prokýrorlar 11 buzýshylyqty anyqtady. Atap aıtqanda, Ákimshilik quqyqbuzýshylyq kodeksiniń 114-baby boıynsha máslıhat depýtattyǵyna kandıdattardyń úgit materıaldaryn búldirgeni úshin 6 azamatqa aıyppul salyndy. Almatyda páter ıeleri kooperatıviniń tóraǵasy qalalyq máslıhat depýtattynyń kandıdatyna turǵyn úılerdiń kireberisinde úgit materıaldaryn ornalastyrýǵa ruqsat berip, basqa kandıdatqa tyıym salǵan. Osylaısha PIK basshysy kandıdattyń úgit-nasıhat jumysyna kedergi keltirdi. Aıypty jaýapqa tartyldy», - dedi Jandos Ómirálıev Ortalyq saılaý komıssııasy otyrysy barysynda.

«Qaraǵandy oblysynyń turǵyny ýchaskelik saılaý komıssııasynyń múshesi bola otyryp, aýdandyq máslıhat depýtattyǵyna kandıdattyń úgit materıaldaryn taratqany anyqtaldy. Buǵan zańmen tyıym salynǵan. Osyǵan baılanysty oǵan aıyppul salyndy. Odan bólek, Túrkistan oblysynda qalalyq máslıhat depýtattyǵyna kandıdat saılaý aldyndaǵy úgit júrgizý sharttaryn buzdy. Ol qum-qıyrshyq tas qospasyn tóseý boıynsha tegin qyzmet kórsetken. Sot oǵan ákimshilik quzyqbuzýshylyq kodeksi 122-babynyń 2-bóligi boıynsha aıyppul saldy», -deıdi ol.