Qaraǵandyda saılaý karantındi saqtaı otyryp, qalypty ótýde - reseılik baıqaýshy

QARAǴANDY. QazAqparat – Qaraǵandy oblysynda TMD Parlamentaralyq Assambleıasynan halyqaralyq baıqaýshylar toby jumys isteýde. Tańerteń olar oblys ortalyǵyndaǵy jáne basqa qalalardaǵy saılaý ýchaskelerine bardy, dep habarlaıdy QazAqparat tilshisi.

Mıssııa múshesi, Kýzbass Parlamentiniń depýtaty, Kemerovo memlekettik ýnıversıtetiniń otan tarıhy kafedrasynyń meńgerýshisi Alekseı Zelenın saılaý barysy týraly pikirin aıtty.

«Bizdiń delegatsııa quramynda alty adam bar. Biz Qaraǵandy oblysynda jumys isteımiz. Qaraǵandydaǵy birneshe saılaý ýchaskesine, basqa qalalarǵa baramyz. Qazirgi ýaqytta bizde eshqandaı eskertý joq. Bári Qazaqstan Respýblıkasynyń zańnamasyn saqtaı otyryp, qalypty ótip jatqanyn kórip otyrmyz. Saılaýshylardyń erik bildirýine eshteńe kedergi emes. Eń bastysy - epıdemıologııalyq qaýipsizdik sharalaryn saqtaý. Barlyq ýchaskede jeke qorǵanys quraldarynyń bar ekenin kórip otyrmyz», - dep atap ótti reseılik baıqaýshy Qaztutynýodaǵy Qaraǵandy ekonomıkalyq ýnıversıtetiniń №66 saılaý ýchaskesinde bolǵan kezde.

Ol saılaýdy ashyq jáne jarııa atmosferada ótkizýdiń mańyzyn atap ótti. Halyqaralyq baıqaýshylar jumysynyń negizgi qaǵıdattary - beıtaraptyq, memlekettiń ishki isterine aralaspaý.

«Qazaqstanda kóppartııalyqty jáne saıası básekelestikti damytýǵa, azamattyq belsendilikti arttyrýǵa baǵyttalǵan reformalar júrgizildi. Baqylaýshylar mıssııasynyń jumysy zańdylyq protsesin kórý úshin óte mańyzdy. Kemerovten Qazaqstanǵa jetý qıyn boldy – men Mınsk arqyly ushyp keldim. Qaraǵandy oblysyna kelgenimiz óte jaqsy boldy. Bizdi kóp nárse biriktiredi: ónerkásip te, tarıhı baılanystar da», - deıdi Alekseı Zelenın.

Ýchaskelik saılaý komıssııasynyń tóraǵasy Saıran Ulaqovtyń aıtýynsha, saılaýshylar aǵyny birqalypty júrip jatyr. Alǵashqylardyń biri bolyp 85 jastaǵy aqsaqal daýys berdi.

«Biz egde jastaǵy saılaýshylarǵa qońyraý shaldyq – bizde 80 jastan asqan 90-ǵa jýyq adam bar. Keıbireýler mamandardyń úıge kelýin ótindi. Alaıda kópshiligi ózderi kelip, daýys beretinin aıtty. Men saılaýda buryndary da jumys istegenmin. Koronavırýs pandemııasy óz túzetýlerin engizdi. Eń aldymen, bul - sanıtarlyq sharalardy qatań saqtaý. Daýys berý zalynda ylǵaldy jınaý, kvartstaý, jeldetý jumysyn júrgizemiz. Kórip otyrǵandaryńyzdaı, stendte aldyńǵy perde joq: jabyq keńistikte qaýip kóp. Eriktiler kezekshilik etedi, olar erejelerdi túsindiredi jáne múmkindigi shekteýli adamdarǵa kómektesedi», - deıdi komıssııa basshysy.

QR OSK derekterine saı, Qaraǵandy oblysy boıynsha saılaýshylardyń 12.00-ge deıingi saılaýǵa kelý kórsetkishi - 33,5%. Kúni boıy aqparat jańartylady.

Saılaýdyń aldyn ala qorytyndysy 22.00-de shyǵarylady.