Qaraǵandyda saýda ortalyǵynan «órt shyqty»: 660-qa jýyq adam qutqaryldy
ASTANA. QazAqparat - Búgin tańerteń Qaraǵandydaǵy «Taır» saýda úıinde taktıkalyq oqý-jattyǵý sharalary bastady, dep habarlaıdy QazAqparat.
Aldyn ala jasalǵan josparǵa saı, Qaraǵandydaǵy «Taır» saýda úıiniń kınoteatrynan «órt shyǵyp», ózge bólikterge tarala bastaǵan. Saýda ortalyǵynyń mamandary órt sóndirýshiler jetkenshe nysandaǵy adamdardy syrtqa shyǵaryp, dabyl júıesin qosty. Osydan soń saýda úıiniń mamandary óz kúshimen tilsiz jaýdy aýyzdyqtaýǵa kóshken. Jalyn týraly habar túsken soń alǵashqy órt sóndirý tehnıkasy oqıǵa ornyna 10 mınýttyń ishinde jetken. Olar tilsiz jaýdy sóndirýge ári ǵımaratta qalǵan adamdardy syrtqa shyǵarýǵa kirisken.
Qutqarýshylar saýda ortalyǵynan 640 adamdy evakýatsııalady. Taǵy 14 adam ǵımarattyń tóbesinen avtobaspaldaqpen tómenge túsirildi. Al jalynnyń ortasynda qalǵan 4 adamdy TJ mamandary qaýipsizdik kaskasyn kıgizip, syrtqa alyp shyqty.
«Bul nysan tegin tańdalǵan joq, saýda úıiniń syzbasy kúrdeli. Ol halyq kóp baratyn ári órt qaýiptiligi basym nysandardyń biri. Qutqarýshylar kelmeı turyp órtti saýda úıiniń mamandary sóndirýge kirisý kerek, osy jumys boıynsha birqatar qatelikter ketti. Biz osy qatelikter men kemshilikter boıynsha keńesterimizdi berip, ári qaraı jumys jasaıtyn bolamyz», - dep málimdedi Tótenshe jaǵdaılar departamentiniń bastyǵy Ibragım Kúlshimbaev.
«Taır» saýda ortalyǵy ǵımaratynyń jalpy aýmaǵy 46 myń sharshy metrdi quraıdy. Kınoteatr úshinshi qabatta ornalasqan, al tórtinshi jáne ekinshi qabattarda kóńil kóterý oryndary bar. Saýda úıi basshylyǵynyń málimetinshe, ǵımaratta syrtqa shyǵatyn basty 5 esik, sondaı-aq 11 evakýatsııalyq jáne 6 apattyq shyǵý esikteri bar.
«Árıne, mundaı oqý-jattyǵý jumystarynda saýda úıi qyzmetkerleri tarapynan kemshilik ketip jatsa, ony keıin túzetemiz. Sondaı kemshilikterdi jibermeý úshin oqý-jattyǵýdyń ótkizilgenin ózimiz qalaǵan bolatynbyz. Kınoteatr men kóńil kóterý oryndary bizde joǵarǵy qabattarda ornalasqan. Bul bastapqy jobada solaı ketken. Degenmen, kınozal men kóńil kóterý oryndarynda bir jaǵdaı bola qalsa, syrtqa shyǵatyn jeke esikter bar», - dep málimdedi "Taır" saýda ornynyń dırektor orynbasary Dastan Isaıynov.
Qazirgi ýaqytta Tótenshe jaǵdaılar departamentiniń mamandary saýda úıinde ótkizilgen oqý-jattyǵý jumystaryn saralap jatyr. Qaraǵandy oblysynda 171 iri saýda orny bar. Bolashaqta olardyń barlyǵynda osyndaı jumystar júrgiziletin bolady.
Araılym ERKEBAEVA
