Qaraǵandyda sanıtarlyq dárigerler bazarlar men saýda úılerinde reıdter ótkizýde
QARAǴANDY. QazAqparat - Qaraǵandydaǵy bazarlar men saýda úılerinde júrgizilgen reıd barysynda sanıtarlyq dárigerler satýshylar men satyp alýshylarǵa A gepatıtiniń aldyn alý týraly aqparat jazylǵan paraqshalar taratty.
Osyndaı reıdterdiń biri «Shyǵys» bazarynda ótti, dep habarlaıdy óńir basshysynyń resmı saıty.
- Biz nasıhat-túsindirý jumystaryn ótkizip jatyrmyz, gıgıena erejeleri týraly, aýrý qaýpin qalaı tómendetýge bolatyny týraly aıtamyz, - deıdi Qaraǵandy oblysynyń Qoǵamdyq densaýlyqty qorǵaý departamentiniń azyq-túlik nysandaryn sanıtarlyq-gıgıenalyq baqylaý bóliminiń jetekshisi Gúlmıra Kúzembaeva.
Mamandar kókóknister men jemisterdiń saqtalý sharttaryna basa nazar aýdardy. Olar qoımalardy aralap shyǵyp, ereje buzý derekterin anyqtamaǵan: taýar salynǵan jáshikter tártipke saı qoımalarǵa qoıylǵan, barlyq kókókister qaptarǵa salynǵan.
«Shyǵys» bazarynyń sanıtarlyq ınspektory Sergeı Shýltstiń aıtýynsha, kúndelikti túrde saýda núkteleriniń tazalyǵy, satýshylardyń aljapqyshtarynyń bary jáne taýardyń sapasy tekserilip otyrady. Sonymen qatar aýmaqta kókónister men jemisterde nıtrattar men basqa da zııandy qospalardyń bar-joǵyn anyqtaý úshin úlgi alatyn zerthana jumys isteıdi.
Munda sonymen qatar kúndelikti fıto-sanıtarlyq baqylaý júrgiziledi. Mamandar bazardyń aýmaǵyna kiretin barlyq júk mashınalaryn tekseredi. Eger taýarǵa sáıkesinshe qajetti qujattar bolmasa, ony satýǵa tyıym salynady.
Aıta ketý kerek, ótken jyly bekitilgen sanıtarlyq normalarǵa sáıkes, sanıtarlyq dárigerler josparly túrde bazarlar men saýda núkteleri, 50 orynnan az syıymdylyǵy bar qoǵamdyq tamaqtaný oryndaryn teksere almaıtynyn atap ótken jón. Tekseristi olar tek jospardan tys, tutynýshylardan shaǵym túskende, qoǵamdyq densaýlyqqa qaýip tóngen jaǵdaıda ǵana ótkize alady. Osylaısha, 2017 jyly departamentke Qaraǵandy oblysynyń turǵyndarynan bazarlar men dúkenderdegi ónimderdiń sapasyna baılanysty 10 shaǵym túsken. Onyń altaýynda dárigerler tekseriske shyqqan.
