Qaraǵandyda salyqtan jaltarǵan eki kompanııa áshkerelendi

QARAǴANDY. QazAqparat - Qaraǵandyda jalǵan shot-faktýra jazýmen aınalysqan qylmystyq top anyqtaldy, dep habarlaıdy QazAqparat Qarjy mınıstrliginiń qarjy monıtorıng komıtetine silteme jasap.

Qarjy monıtorıngi komıtetiniń Qaraǵandy oblysy boıynsha ekonomıkalyq tergeý departamenti qyzmetkerleri «STOP OBNAL» jedel aldyn alý is-sharasyn ótkizdi.

«Nátıjesinde birqatar zańdy tulǵalardyń atynan naqty oryndalmaǵan jumys pen jetkizilmegen taýarlarǵa jalǵan shot-faktýra jazýmen zańsyz aınalysqan uıymdasqan qylmystyq toptyń qyzmeti áshkerelendi. Qazirgi ýaqytta «TerraStyleKAZ» jáne «AzımýtInvest» JShS qatysty sotqa deıingi tergeý júrip jatyr. Uıymdasqan toptyń baqylaýyndaǵy eki zańdy tulǵa qyzmetiniń qarjy aınalymy - 5,7 mlrd teńge. Salyq tólemeýden memleketke kelgen shyǵyn kólemi – 1,7 mlrd teńge» delingen habarlamada.

Atalǵan qylmys boıynsha múlkin tárkileı otyryp, segiz jylǵa deıin bas bostandyǵynan aıyrý jazasy qarastyrylǵan.