Qaraǵandyda sal aýrýyna shaldyqqan balalarǵa arnalǵan fýtbol mektebi ashylady
QARAǴANDY. QazAqparat - Qaraǵandyda sal aýrýyna shaldyqqan balalar úshin fýtbol mektebin qurý týraly memorandýmǵa qol qoıyldy, dep habarlaıdy oblys ákimdiginiń resmı saıty.
qaraǵKelisim alty vedomstvo arasynda jasaldy: Qaraǵandy oblystyq bilim basqarmasy, Dene shynyqtyrý jáne sport basqarmasy, «Shahter» FK, «Nur Otan» partııasynyń Qaraǵandy oblystyq fılıaly, Bilim mınıstrliginiń dene shynyqtyrý ǵylymı-saıası ortalyǵy jáne Qazaqstan fýtbol federatsııasynyń buqaralyq fýtbol departamenti.
- Bul óte mańyzdy áleýmettik joba, bizge sal aýrýyna shaldyqqan balalardy qoldaý qajet. Ókinishke oraı, bizde osyndaı dıagnozy bar adamdar kóp. Fýtbol mektebinde sonymen qatar shalǵaıdaǵy aýyldardan kelgen balalar da sportpen shuǵyldana alady. Olar Qaraǵandy tehnıkalyq-qurylys kolledji bazasynda qurylatyn ınternatta mekendeı alady. Qazirgi tańda onda fýtbol alańyn salý boıynsha qurylys jumystary bastalyp ketti, - dedi Qazaqstan fýtbol federatsııasynyń buqaralyq fýtbol departamentiniń dırektory Erlan Jamantaev.
Fýtbol mektebi sal aýrýyna shaldyqqan 10 jastan joǵary 70 balany qabyldaı alady. Erekshe balalarǵa arnalǵan oıyn sharttary da ózgeshe: komandalar 7 adamnan quralady, match 20 mınýttyq eki taımǵa bólingen.
Erekshe balalarǵa arnalǵan sport mektebin qurý jobasyn ÝEFA da qoldady. Atalmysh federatsııanyń mamandary Qaraǵandyǵa kelip, «Shahter» FK usynatyn jattyqtyrýshylardy múmkindigi shekteýli balalarmen jumys isteý sheberligine úıretýdi josparlap otyr.
Kelesi jyly Qaraǵandy sportshylary sal aýrýyna shaldyqqan balalar arasyndaǵy fýtbol boıynsha Álem chempıonatyna qatysady degen jospar bar.
Búgingi tańda osyndaı mektep Almaty qalasynda jumys isteıdi. Ony aǵymdaǵy jyldyń mamyrynda ashqan.
Esterińizge sala keteıik, ótken jyly Qazaqstan Fýtbol federatsııasy sal aýrýyna shaldyqqan balalar arasyndaǵy Halyqaralyq fýtbol federatsııasyna enip, birinshi chempıonatyn ótkizgen bolatyn. Qazannyń 1-i men 5-i aralyǵynda ótken bıylǵy jylǵy chempıonatqa Almaty sport mektebiniń tárbıelenýshileri qatysyp ta úlgerdi.
