Qaraǵandyda «Rýhanı jańǵyrý» baǵdarlamasy aıasynda jańa Neke qııý saraıy ashyldy

QARAǴANDY. QazAqparat - Qaraǵandylyqtar neke qııý rásimin sáýleti men dáýleti kelisken jańa Saltanat saraıynda ótkizý múmkindigine ıe boldy. Jerlesterine mundaı syılyqty kásipker Bolat Qojaqpaev jasaǵan. Jańa ǵımarat bıznesmenniń «Rýhanı jańǵyrý» baǵdarlamasyn júzege asyrýǵa qosqan úlesi boldy, dep habarlaıdy QazAqparat tilshisi.

Qaraǵandy oblysynyń ákimi Erlan Qoshanov «Aq saraı» saltanat saraıyna bardy. Óńir basshysy jas jubaılar, altyn jáne kúmis mereıtoıyn atap jatqan juptardyń saltanat zalynda nekesin tirkeý sátine kez keldi. Oblys ákimi januıalardy ataýly meıramdarymen quttyqtady.

«Qaraǵandylyqtarǵa mundaı saraı kópten beri kerek bolǵan. Endi nekeni zamanaýı jaǵdaıǵa qııý múmkindigi týdy. Mahabbattyń keń saraıy jastarǵa baqyt pen bereke ákelerine senimim mol. Bul jaı ǵana qala úshin jasalǵan syılyq emes. Partrıottyq pen metsenttyqtyń, adal eńbektiń úlgisi. Óńirimizdiń ár turǵyny, kez kelgen kásipkeri «Rýhanı jańǵyrý» baǵdarlamasyn júzege asyrýda atsalysqany óte mańyzdy», - dedi oblys basshysy.

Buǵan deıin Neke qııý saraıy tozyǵy jetken, tar ári yńǵaısyz eski ǵımaratta ornalasqan edi. Bolat Qojaqpaev óz qarajatyna saltanat saraıymen qosa meıramhana jáne qonaqúı keshenin salyp berdi. Jobanyń jalpy quny 3 mlrd teńgeni qurady. Aýmaǵy - 16,5 myń sharshy metr. Ǵımarattyń keı bóligin kásipker óz qalaýymen Qaraǵandy qalasy Qazybek bı aýdanynyń ákimdigine ótkizdi. Bir aı buryn bul jerge AHAT bólimi kóship kelgen edi. Onyń qyzmetkerleri jumys jasaý jaǵdaıynyń jaqsarǵanyn erekshe atap ótti. Shilde aıynda jańa ǵımaratta 500 jup nekesin qıdyryp úlgergen. Saltanat ıeleri bılik pen kásipkerge ómirlerindegi erekshe kúndi osyndaı ásem ǵımaratta ótkize alatyndaryna alǵystaryn bildirdi.