Qaraǵandyda roýp-djampıngte qaza bolǵan kelinshekke qatysty sot otyrysy bastaldy
QARAǴANDY. QazAqparat – Roýp-djampıng nusqaýshysynyń arnaýly biliktiligi bolmaǵan. Bul týraly qonaq úı tóbesindegi attraktsıonnan sekirip, kóz jumǵan 33 jastaǵy Evgenııa Leontevanyń ólimine qatysty is boıynsha sottyń birinshi otyrysynda belgili boldy, dep habarlaıdy QazAqparat tilshisi.
Іs Qaraǵandy qalasynyń Qazybek bı aýdandyq sotynda qaraldy. Anyqtalǵanyndaı, 32 jastaǵy sottalýshy eńbek shartynsyz, beıresmı túrde roýp-djampıng nusqaýshysy bolyp jumys istegen. Ony «Fly Kazakhstan» JShS dırektory jumysqa alǵan. Al, bul kompanııanyń ıesi Reseıde turady.
Sondaı-aq, sottalýshynyń bıiktikten sekirý boıynsha arnaıy biliktiligi men jumys tájirıbesi joqtyǵy belgili boldy. Oǵan sekiretin adamǵa qaýipsizdik belbeýin bekitý, sekirý aldynda ony daıyndaý jáne nusqaý berý mindetteri artylǵan. Prokýror kompanııanyń attraktsıondardy qaýipsiz paıdalaný erejelerin retteıtin qujattary joq ekenin atap ótti.
«Sottalýshy ekinshi nusqaýshy jaýap beretin tejegish júıesiniń daıyndyǵyna kóz jetkizbegen. Ol odan aýyzsha daýys belgisin nemese onyń daıyndyǵy týraly qımyl ısharatyn almaǵan. Osylaısha, sekirýge qaýipti jaǵdaı jasap, qylmystyq nemquraılylyq tanytty, tejegish júıeniń daıyndyǵyna kóz jetkizbedi, Leontevaǵa shatyrdyń parapetine turýdy nusqady. Bul - adamnyń sekirýge tolyq daıyndyǵyn bildirdi. Osydan keıin Leonteva tómen qaraı sekirgen. Asfaltqa qulap, metall qurylymǵa soǵylǵan. Aýyr zaqym alyp, esinen tanyp qalǵan. Ol Maqajanov atyndaǵy klınıkaǵa jatqyzylyp, esin jımastan qaıtys boldy», - dep baıandady prokýror.
Qaıǵyly oqıǵa kezinde marqumnyń janynda jubaıy men dostary bolǵan.
«Meniń oıymsha, sottalýshy aıypty. Ol ekinshi nusqaýshymen áreketterin kelispedi, tómenge qaramady, tejegish kabeldiń baılanǵanyna kóz jetkizbedi. Ol jaı ǵana oǵan «sekirińiz» dedi. Bul óte qıyn jaǵdaı... Mundaı qaıǵyny eshkimge tilemeımin. Men onyń zańǵa sáıkes jazalanǵanyn qalaımyn. Bul onyń jáne osy kompanııanyń dırektorynyń júz paıyz kinási. Dırektordy taba almaı jatyr deıdi, ol izdeýde. Men sottalýshynyń anasymen kezdestim. Ol balasy úshin keshirim surady. Biraq jubaıymnyń anasyna eshkim kelgen joq. Betpe-bet kezdesýde de bir-birimizge qarama-qarsy otyrdyq, ol tipti keshirim suramady. Men báriniń ádil bolýyn talap etemin», - dedi sotta marqumnyń kúıeýi Aleksandr Tkachenko.
Alaıda sottalýshynyń ózi kinásin moıyndamaı otyr.
Búgingi otyrysta sýdıa bir ǵana kýáger – Anton Shevelevtiń jaýabyn tyńdaı aldy. Ol da áıelimen birge sol kúni qaıǵyly oqıǵa ornynda bolǵan. Evgenııa sekirer aldynda onyń jubaıy Svetlanamen oryn aýystyrypty.
«Ol qorqyp, sekirgisi kelmedi. Sondyqtan, Svetlana birinshi bolyp sekirdi. Sodan keıin Jenıa taǵy da qoryqty, men onyń ornyna sekirgim keldi, biraq sottalýshy odan sekirýin talap etti», - dedi Anton Shevelev.
Qysqa úzilisten keıin aıyptalýshy ózin nashar sezinetinin málimdep, sottan protsesti basqa kúnge aýystyrýdy surady. Kelesi otyrys 26 sáýirde ótedi.
Eske sala keteıik, qaıǵyly oqıǵa ótken jyldyń 10 qazanynda bolǵan.
Sottalýshy oryndyǵynda roýp-djampıng nusqaýshysy otyr. Oǵan QR QK 306-babynyń 3-bóligi «Abaısyzda adam ólimine ákep soqqan, tutynýshylardyń ómiri men densaýlyǵy qaýipsizdiginiń talaptaryna saı kelmeıtin jumystardy oryndaý ne qyzmetter kórsetý» boıynsha aıyp taǵyldy.
Sarapshylardyń pikirinshe, Evgenııanyń qaıtys bolýyna attraktsıon kabeliniń bekitilmegeni sebep bolǵan. Attraktsıondy uıymdastyrýshylar 4 jyldan 8 jylǵa deıin bas bostandyǵynan aıyrylýy múmkin.
