Qaraǵandyda retro kólikterdiń avtosherýi men kórmesi ótti
ASTANA. QazAqparat - Qaraǵandyda Jeńis kúnine oraı retro kólikter kórmesi uıymdastyryldy. Eski mashınalar aldymen «Máńgilik alaý» memorıalynyń aldynda tizildi, sonan soń avtokolonna Ortalyq saıabaqqa qaraı bet aldy. Kórmeni tamashalaýǵa kelgen kez kelgen adam kólikterge otyryp, sýretke túsý múmkindigine ıe boldy, dep habarlaıdy oblystyq ákimdiktiń baspasóz qyzmeti.
Ár kóliktiń ózindik tarıhy bar.
- Mende el arasynda «kopeıka» dep atalatyn VAZ 2101 mashınasy bar, - deıdi kórmege qatysýshy Igor Levıchev. - Bul mashınaǵa 40 jyl toldy. Ol maǵan atamnan qalǵan. Men onyń birde bir bólshegin aýystyrǵan joqpyn. Atam zaýyttan shyqqan bette qalaı satyp aldy, sol beti júr. Búgingi kúni de onda esh aqaý joq, barlyǵy tamasha. Men onymen tipti Balqash pen Qarqaralyǵa da baryp kelemin, barlyq joldarǵa shydaıdy.
Kórmede budan da eski rarıtet modelder boldy. Sonyń biri - Ekinshi dúnıejúzilik soǵys kezindegi «Vıllıs MB».
- Men bul kólikti Qostanaı qalasynda turatyn bir kisiden satyp aldym. Ol osy mashınany soǵystan aıdap kelgen eken. Ol jańadan jasalǵan model emes, - deıdi kólik ıesi Sergeı. - Men satyp alǵanda maşına júrmeıtin. Qaıta qalpyna keltirý úshin úsh jyl ýaqyt ketti. Ótken jyly kóliktiń «óz» bólshekteri: beldigi men qorapshasyna qaraı otyra, saraptama jasattym. Saraptamanyń qorytyndysyna súıensek, mashına1942 jyldyń qazan aıynda shyǵarylǵan. Ol maıdandaǵy shaıqastarǵa qatysqan. Sondyqtan men onyń óziniń bólshekterin izdedim, túpnusqa kúıinde qaldyrýǵa tyrystym. Mundaı mashınalar KSRO-ǵa Amerıka qurama shtattarynan jetkizilgen. Men qazir munymen kóp júre qoımaımyn. Ol meniń janyma jylý syılaıtyn kólik. Jolda júrgende ózine kóp nazar aýdartady, adamdar sýretke túsýdi ótinedi.
Kópshiliktiń nazaryna bólengen taǵy bir eksponat - el arasynda «Kozlık» dep atalyp ketken 1955 jyly shyǵarylǵan GAZ 69 kóligi boldy. Onyń ıesi ıAn Pashkovskıı bul mashınany birneshe jyl buryn satyp alǵan eken. Qazir onymen jumysqa, qala syrtyna shyǵady.
- Mende «Nıva» da, shet eldik kólikter de boldy. Biraq eshqaısysy myna GAZ-dan asyp túse almady, - deıdi kólik ıesi. - Men ony qaıta qalpyna keltirgen joqpyn, ol tamasha jumys isteıdi, júredi, kez kelgen jolǵa tózimdi. Men ony eshqashan satpaımyn.
KSRO kezinde astamdyqtyń belgisi bolǵan, kórneki toptaǵy «Pobeda» mashınasy da osy kórmede kórsetildi. Qaraǵandylyq Stanıslav Polýdınskııge «Pobeda M20» atasynan qalǵan. Satyp alynǵannan beri bul kóliktiń túsinen basqa eshteńesi ózgertilmegen, aýystyrylmaǵan. 60-shy jyldary ony jasyl túske boıaǵan.
- Bul keremet mashına, - deıdi Stanıslav. - Ádette men «Mersedespen» júremin. Biraq, bilesizder me, «Pobeda» jumsaǵyraq júredi, róli de gıdrokúsheıtkishsiz bolsa da, óte jumsaq. Bul - otbasylyq jádiger. Atam ony qatty jaqsy kóretin. Bul mashına bizdiń otbasymyzda mura retinde ákeden balaǵa berilip otyrady.
