Qaraǵandyda Reseıdiń saqtandyrý kompanııasy atynan jalǵan qujattar jasalǵan
QARAǴANDY. QazAqparat – Qaraǵandyda kóliktiń tehnıkalyq baıqaýdan ótkeni týraly Reseı kompanııasy atynan jalǵan qujattar satylyp kelgen, dep habarlaıdy QazAqparat Rolisia.kz-ke silteme jasap.
Oblystyq Polıtsııa departamenti Uıymdasqan qylmysqa qarsy kúres basqarmasynyń qyzmetkerlerine qaladaǵy saqtandyrý kompanııalarynyń birinde tehnıkalyq baıqaýdan ótkeni týraly jalǵan qujattar satylatyny jóninde aqparat túsken.
«Polıtsııa qyzmetkerleri júrgizgen keshendi jedel-izdestirý is-sharalary barysynda saqtandyrý kompanııalarynyń biriniń 35 jastaǵy menedjeri ustaldy.
Aıǵaq zattar, sonyń ishinde avtokólikterdiń tehnıkalyq baıqaýdan ótkendigi týraly mór basylǵan jalǵan 24 blank tárkilendi.
Sondaı-aq kúdiktiniń turǵylyqty mekenjaıynan Reseıdiń saqtandyrý kompanııasynyń móri, Reseı saqtandyrý kompanııasynyń 33 blanki, ártúrli kólikterge qatysty 30 dana dıagnostıkalyq karta, pnevmatıkalyq tapansha jáne eki pyshaq tárkilendi.
QR Qylmystyq kodeksiniń 385-baby boıynsha sotqa deıingi tergeý amaldary júrgizilip jatyr», - delingen málimette.
