Qaraǵandyda polıtsııa balalar alańyna pyshaq qadap ketken adamdy tapty
QARAǴANDY. QazAqparat - Qaraǵandyda balalardyń oıyn alańy men gúl shoqtarynyń arasynda kóp pyshaq qadap ketken adam anyqtaldy, dep habarlaıdy QazAqparat.
Oblystyq ІІD baspasóz qyzmetiniń málimetinshe, 21 shildede jáne 1 tamyzda polıtsııaǵa jerge qadalyp turǵan pyshaqtarǵa qatysty úsh habar kelip túsken. Ýchaskelik ınspektorlar, krımınaldyq polıtsııa jáne ıývenaldyq polıtsııa qyzmetkerlerinen jasaqtalǵan 3 jumys toby quryldy.
Olar sol mańaıǵa jaqyn úılerdiń turǵyndarynan oqıa týraly surastyryp kórdi. Baqylaý kameralaryndaǵy vıdeolar qaraldy. Odan jerge pyshaq qadap júrgen keıýana ekeni anyqtaldy.
«Jol-patrýldik polıtsııa polkiniń qyzmetkerleri 68 jastaǵy qala turǵynyn ustady. Jaýap alý barysynda áıel adam aıaǵy aýyryp júrgenin, sony dástúrli emes medıtsına ádisimen emdemek bolǵanyn aıtyp jetkizdi. Ol bir jýrnaldan paıdalanylmaǵan pyshaqtardyń kómegimen, ıaǵnı olardy ashyq alańǵa, jerge qadap qoıý arqyly emdeýge bolatynyn oqyǵan. Osyndaı emdeý tásilin ysanp kórmek bolǵan ol túrli saýda oryndarynan pyshaqtar satyp alǵan», - dep túsindirdi baspasóz qyzmeti.
Áıel adamnyń ústinen «Usaq buzaqylyq» baby boıynsha ákimshilik hattama toltyryldy.
Eske sala ketsek, Qaraǵandyda balalar oınaıtyn alańda jerge qadalǵan 72 pyshaq tabyldy. Bir aptadan soń oqys oqıǵa qaıtalandy, bul jol gúl shoqtary arasynan 36 pyshaq tabyldy.
Avtor: Gúlzat Sahova
