Qaraǵandyda polıtsııa ardageriniń qurmetine memorıaldyq taqta ashyldy

QARAǴANDY. QazAqparat - Búgin Qaraǵandyda mılıtsııa polkovnıgi Dosbek Adambekovtyń qurmetine ІІB ardageri turǵan úıdiń qabyrǵasyna memorıaldyq taqta ornatyldy, dep habarlaıdy QazAqparat tilshisi.

Qaraǵandy qalasynyń Stepnoı-3 yqsham aýdany №3 úıiniń qabyrǵasyna ornatylǵan memorıaldy taqtanyń ashylý saltanatyna oblystyq PD basshylyǵy, ákimdik ókilderi, ІІO aragerleri jáne Adambekovter otbasy qatysty.

Memorıaldyq taqtany saltanatty túrde ashý qurmeti Qaraǵandy qalasynyń ákimi Nurlan Áýbákirovke jáne Qaraǵandy oblysy polıtsııa departamentiniń bastyǵy polıtsııa polkovnıgi Erlan Faızýllınge usynyldy.

«Búgin - Qaraǵandy qalasynyń barlyq polıtsııa qyzmetkerleri úshin erekshe kún. Biz aýǵan soǵysynyń, ishki ister organdarynyń ardageri, mılıtsııa polkovnıgi Dosbek Kópbaıuly Adambekovke qurmet kórsetip, saltanatty túrde memorıaldyq taqta ashyp otyrmyz», - dep atap ótti oblystyq PD bastyǵy Erlan Faızýllın.

Dosbek Kópbaıuly óziniń eńbek jolyn 15 jasynda bastaǵan. Keńes áskeri qatarynda qyzmet etip, 1962 jyly ishki ister organdaryna jumysqa ornalasqan. Qatardaǵy mılıtsıoner laýazymynan bastap kóptegen qurmet pen ataqqa ıe bolyp, súıikti isine 32 jylyn arnady.

Dosbek Kópbaıulynyń kásibı sheberligin ІІM basshylyǵy joǵary baǵalaǵan. Ol Mańǵyshlaq jáne Gýrev oblysy, Jezqazǵan qalasynyń ІІB bastyǵynyń orynbasary, Saran qalasynyń ІІO jáne Qaraǵandy qalasynyń ІІB bastyǵy laýazymdarynda eńbek etken. Sonymen qatar, «Minsiz qyzmeti úshin», «ІІM úzdik qyzmeti úshin», «Eńbek ardageri» medaldary men «Mılıtsııa úzdigi» sekildi marapattardyń ıegeri.

Dosbek Adambekov KSRO ІІM keńesshisi bolǵan. Aýǵanstanda qyzmet atqarý barysynda «Juldyz» ordeni, «Aýǵanstannyń razy halqynan» jáne «Jaýynger-ınternatsıonalıst» medaldarymen marapattalǵan.

Dosbek Kópbaıuly zeınetkerlikke 1994 jyly shyqqan.

Saltanatty jıyn barysynda ardagerdiń týystarynyń atynan aǵasy Ermekbaı Adambekov pen nemeresi Rýstam Adambekov alǵys bildirdi.