Qaraǵandyda polıtseılerge para bergen toǵyz kólik ıesi sottaldy
QARAǴANDY. QazAqparat - Qaraǵandyda «Joldarda sybaılas jemqorlyqtyń bolýyn qysqartýdyń 10 qadamy» jobasy aıasynda jol-patrýldik polıtsııa qyzmetkerlerine para bergen toǵyz kólik ıeleriniń isi áshkerelenip, sottaldy, dep habarlady «QazAqparat» HAA tilshisi.
Jobany oblystyń memlekettik qyzmet isteri jáne sybaılas jemqorlyqqa qarsy is-qımyl departamentiniń qyzmetkerleri oılastyrdy. Joba jańa bolǵanyna qaramastan, jaqsy nátıje kórsetýde.
«Sybaılas jemqorlyqpen baılanysty quqyqbuzýshylyqqa jol bergeni úshin 8 polıtseı, 9 júrgizýshi qylmystyq jaýapqa tartyldy. Birinshisi - para alsa, ekinshisi - para bergen», dedi departamenttiń baspasóz hatshysy Ásemgúl Beksultanova.
Jol polıtsııasy men kóliktik baqylaý qyzmetkerlerimen ózara qatynas tártibi boıynsha arnaıy nusqama beretin ádebıetterdiń kómegimen «Sybaılas jemqorlyq táýekelderiniń kartasy» ázirlendi.
«Jolda jemqorlyqqa jol bergender kópshilikke jarııa etilip, reıdter, monıtorıngter júrgiziledi. Áleýmettik jelidegi dıalog alańyna basa mán beremiz. Azamattar problemalarymen bólisip, oǵan jedel jaýap ala alady», - dep habarlady Ásemgúl Beksultanova.
Jobanyń negizgi maqsaty - jol polıtsııasy, kólik ınspektsııasy, keden organdarynda jemqorlyq táýekelderin anyqtaý, azaıtý. HQKO-da, Keden beketterinde memlekettik qyzmet kórsetý kezindegi ákimshilik tosqaýyldardy joıý. Sondaı-aq jergilikti polıtsııa qyzmetimen birlesip, jolda reıdtik jedel aldyn alý sharalary ótkiziledi.
