Qaraǵandyda polıtseılerden aqsha bopsalaǵan bloger 3,5 jylǵa sottaldy
Tergeý materıaldaryna sáıkes, 28 jastaǵy qaraǵandylyq óziniń seriktesimen birge polıtseılerdiń tártip buzýshylyqtaryn ańdyp, olardy vıdeoǵa túsirgen. Ótken jyldyń kúzinde olar onda patrýldik polıtsııanyń kóligi baǵdarshamnyń tyıym salatyn qyzyl sıgnalyna jarqyldaý belgisinsiz ótip ketkenin kameraǵa túsirip alǵan. Tergeýshilerdiń aıtýynsha, aıyptalýshy bul beıneni paıdalanyp, polıtsııa qyzmetkerlerin qorqytqan. Aýyzbastyryq retinde olardan 150 000 teńge suraǵan.
Sol keshte aıyptalýshy men seriktesi aqsha alǵannan keıin qolǵa túsken. Belgili bolǵandaı, bopsalaýshylarǵa aqsha bermes buryn polıtsııa qyzmetkerleri bul jaǵdaı týraly Jeke qaýipsizdik basqarmasyna habarlaǵan.
Aıǵaqpen ustalǵanyna qaramastan, bloger óz kinásin sotta moıyndamady. Al onyń seriktesi buǵan qatysy joq ekenin jáne sol kúni ol sottalýshynyń qasynda júrgizýshi retinde ǵana júrgenin jetkizdi.
«Qazybek bı aýdandyq soty QR QK 194-baby 2-bóliginiń 2-tarmaǵy boıynsha sottalýshylardy kináli dep tanydy. Sot blogerdi eń joǵary qaýipsizdik mekemesinde jazasyn óteı otyryp 3,5 jylǵa bas bostandyǵynan aıyrdy. Onyń seriktesine 3,5 jylǵa bas bostandyǵyn shekteý jazasy taǵaıyndaldy. Sot úkimi zańdy kúshine engen joq», - dep habarlady Qaraǵandy oblysy Qazybek bı aýdandyq sotynyń baspasóz qyzmeti.