Qaraǵandyda polıtseıler kópirden sekirmek bolǵan er adamdy qutqardy
QARAǴANDY. QazAqparat - 9 tamyzda Qaraǵandy qalasynyń polıtsııa basqarmasy patrýldik polıtsııa polkiniń qyzmetkerleri Raýan Orazbekov pen Erǵanat Qalıolla Buqar jyraý dańǵyly boıyndaǵy kópirden sekirmek bolǵan er adamdy qutqaryp qaldy.
Bul týraly QazAqparat Qaraǵandy oblystyq Polıtsııa departamentiniń Facebook paraqshasyna silteme jasap habarlaıdy.
Qaraǵandy qalasynyń polıtsııa basqarmasy jedel basqarý ortalyǵynan túsken shuǵyl habarlama boıynsha jedel áreket etken polıtseıler ózine qol jumsamaq bolǵan 41 jastaǵy er adamdy ajaldan alyp qaldy.
«Eki - úsh mınýttyń ishinde biz oqıǵa ornyna jettik. Kópirdiń shetinde turǵan er adamdy kórdik. Jarty qadam jasasa qurban blar edi. Óıtkeni, tómende temirjol relsteri, joǵary kerneýdegi baılanys symdary bar. Men qorshaýdan ótip, janyna baryp sóılese bastadym. Er adam otbasyn asyraı almaǵandyqtan osyndaı qadamǵa barǵanyn moıyndady. Men atymdy aıtyp, qolymdy sozdym, ol qolyn usynǵan kezde myqtap ustap áriptesimmen birge ony qaýipsiz jerge shyǵaryp aldyq - dedi Raýan Orazbekov.
Polıtseıler qutqarylǵan azamatty Qaraǵandy qalasynyń polıtsııa basqarmasynyń Ortalyq polıtsııa bólimine jetkizdi. 41 jastaǵy er adam qarjylyq qıyndyqqa baılanysty sharasyz qadamǵa barǵanyn moıyndady.
