Qaraǵandyda polıtseı sýǵa batyp bara jatqan adamdy aman alyp qaldy
QARAǴANDY. QazAqparat - Qaraǵandyda 2 maýsym kúni polıtsııa maıory Dastan Azanbaev Fedorov sý qoımasynda sýǵa batyp bara jatqan er adamdy aman alyp qaldy, dep habarlaıdy ekaraganda.kz.
Qaraǵandy oblystyq Polıtsııa departamentiniń málimetterine qaraǵanda, osy departamentke qarasty jergilikti polıtsııa qyzmetiniń aǵa ınspektory Dastan Azanbaev túski as ishetin mezgilde óziniń inisimen birge úıine ketip bara jatyp, sýǵa batqaly jatqan adamdy baıqap qalǵan.
Bul kezde polıtsııa qyzmetkeriniń inisi jaǵalaýda jelige salatyn kórinis túsirip júrgen. Atalmysh kadrlar ınternetke júktelip, qala turǵyndary ony arnaıy túsirilgen kórinis dep narazylyqtaryn bildirgen.
Rasynda polıtsııa qyzmetkeri sýǵa batyp bara jatqan adamǵa qaraı júgire jónelgen. Al polıtseıdiń inisi beınetúsirilimin toqtatyp, birden polıtsııa men jedel járdemge qońyraý shalǵan.
Oqıǵa ornyna jetken jedel járdem qyzmetkerleri aman qalǵan er adamǵa medıtsınalyq kómek kórsetti.
Zardap shekken azamattyń sózine qaraǵanda, ol sý qoımasynda balyq aýlap júrgen. Bir kezde shomylyp almaq bolyp, sýǵa túsken onyń aıaǵy tyrysyp qalǵan. Ol medıtsınalyq mekemege jetkizildi.
