Qaraǵandyda pıtstserııada oryn bermegen jasóspirimdi sabap ketti
QARAǴANDY. QazAqparat - Qaraǵandy qalasyndaǵy pıtstserııalardyń birinde oryn berýden bas tartqan jasóspirimdi belgisiz adamdar sabap ketti, dep habarlaıdy QazAqparat.
"Qalanyń ońtústik-shyǵysyndaǵy polıtsııa bólimine 38 jastaǵy turǵyn habarlasyp, 11 jastaǵy ulyn belgisiz adamdardyń uryp-soqqanyn jetkizdi", - dep pikir bildirdi oblystyq Polıtsııa departamentiniń ókili Baqytjan Qudııarov.
26 qańtar kúni jasóspirim qaladaǵy pıtstserııalardyń birine dostarymen barǵan.
"Meniń ulym ústelde otyrǵanda belgisiz 6-7 jasóspirim kelgen. Olar ulymdy mazaqtap, oryn berýdi buıyrǵan. Oryn bermegendikten ony kóshege, jeke sóılesýge shaqyrǵan. Kóshege shyqqanda jerge qulatyp, jabylyp tepkilegen", - deıdi zardap shekken balanyń anasy.
Odan bólek, tóbeles mekemeniń beınebaqylaý kamerasyna jazylyp qalǵan. Kadrda balany teýip jatqan sátter jazylǵan jáne aq qarda qan izderi baıqalady.
Anasynyń aıtýynsha, bala qazir úıde. Aýyr jaraqaty joq.
"Jedel izdestirý sharalary arqyly polıtsııa oqıǵanyń barlyq qatysýshylaryn anyqtady. QR Qylmystyq kodeksiniń 293-baby, 2-bóligi (buzaqylyq, uıymdasqan top) boıynsha sotqa deıingi tergeý bastaldy", - dep túsindirdi departament.
