Qaraǵandyda peshten ýlanǵan tórt adam aýrýhanaǵa jetkizildi
QARAǴANDY. QazAqparat – Qaraǵandyda tórt adamǵa ıis tıdi. Mamandardyń aıtýynsha, oqıǵaǵa peshti paıdalaný erejesin saqtamaý sebep bolǵan. Aýrýhanaǵa 80 jastaǵy ájeı, 43 jastaǵy áıel men eki jasóspirim jetkizildi, dep habarlaıdy QazAqparat tilshisi.
1 naýryz kúni saǵat 1:45-te Qaraǵandy qalasynyń Shahterskıı shaǵyn aýdanynda ystan ýlaný týraly habarlama kelip tústi. Kómir jaǵatyn peshti paıdalaný erejesin buzý saldarynan 1941 jáne 1978 jyly týǵan áıelder men on tórt jáne on jeti jastaǵy eki qyz ýlanyp, aýrýhanaǵa jatqyzyldy.
Murjada jaryq bolǵan ári kirpishteri synyq bolǵan.
Qazir eki qyz da oblystyq aýrýhanada jatyr. Dárigerler olardyń jaǵdaıyn ortasha aýyr dep baǵalaıdy. Eresekter aýrýhanaǵa jatýdan bas tartty.
Osyndaı oqıǵalardy boldyrmaý úshin Qaraǵandy oblysynyń TJ departamenti halyq arasynda turaqty negizde úgit-profılaktıkalyq sharasyn júrgizedi. Jylytý maýsymy bastalǵannan beri mamandar 176 myńnan astam adamdy qamtı otyryp, 64 myńnan astam turǵyn úı sektoryn aralady. 2020 jyldyń tamyz aıynan bastap kópbalaly jáne az qamtylǵan otbasylardyń úıine 867 sensor qurylǵy ornatyldy, onyń 150-i tútindi, 717-i ýly gazdy anyqtaıdy.
Soǵan qaramastan, ýly gazdan 2 adam kóz jumyp, 25 adamnyń densaýlyǵyna zaqym kelgen.
Qaraǵandy oblysynyń TJD turmystaǵy qaýipsizdik talaptaryn saqtaýdy eske salady. Jylytý júıesin únemi tekserip, qajet bolǵan jaǵdaıda jóndeýdi usynady. Aqaýly peshti, qazandy, elektr qyzdyrǵysh jáne gaz aspaptaryn paıdalanýǵa bolmaıdy. Murjanyń kúıesin tazartý kerek. Ashyq esikteri bar peshti jaqpaý, otty benzınmen, kerosınmen nemese basqa da tez tutanatyn suıyqpen tutatpaý, peshti qaraýsyz qaldyrmaý jáne janyp jatqan peshti qadaǵalaýdy balaǵa tapsyrmaý.
Sondaı-aq, mamandar elektr aspaptary men elektr symdaryn jaramdy kúıde ustaý qajettigi, elektr jelilerin shamadan tys júktemeý kerektigi týraly eske salady.
