Qaraǵandyda perınataldyq ortalyq patsıentterine arnalǵan SOS júıesi engizildi
QARAǴANDY. QazAqparat – Qaraǵandyda oblystyq klınıkalyq aýrýhananyń №2 perınataldyq ortalyǵynda dabyl túımeleri paıda boldy. Al naýqastarǵa arnaıy bilezikter beriledi, dep habarlaıdy QazAqparat tilshisi.
SOS júıesi shuǵyl medıtsınalyq kómek kórsetýdi jedeldetedi.
«Biz júıeni eki apta buryn engizdik. Naýqastar men dáriigerler ony joǵary baǵalady. Bilezikter sý ótkizbeıdi. Sondyqtan ony shomylǵan kezde de qoldana alady. Barlyǵy 123 bilezik satyp aldyq, olardy bizdiń ortalyqqa túsken barlyq naýqastarǵa beremiz. Bul óte yńǵaıly. Shaqyrý túsken soń qyzmetkerler sanaýly mınýttarda jaýap beredi», - dedi OKA №2 perınataldyq ortalyǵynyń jetekshisi Gúlban Mamalınova.
Dabyl túımeleri tek palatalarda ǵana emes, sonymen qatar jýynatyn bólmelerde de ornatylǵan. Sıgnal medıtsınalyq qyzmetkerlerdiń uıaly telefondaryna túsedi.
Perınataldyq ortalyqqa kireberiste de shaqyrý túımesi bar, ol jerden sıgnal qabyldaý bólimine túsedi. Kezekshi dárigerler dereý qajetti mamandy shaqyra alady.
21 jastaǵy Anna Bosenko bir apta buryn júkti áıelderdiń patologııa bólimine tústi.
«Bul meniń alǵashqy júktiligim. Qant pen joǵary qysymnyń saldarynan meni merzimnen buryn aýrýhanaǵa jatqyzdy. Bilezik óte yńǵaıly. Men ony birneshe ret qoldandym, óıtkeni aı tolǵaq boldy. Bir-eki mınýttan keıin maǵan kómekke keldi», - dedi naýqas.
Jyl sońyna deıin SOS júıesin Qaraǵandynyń barlyq perınataldyq ortalyqtarynda engizý josparlanýda.
