Qaraǵandyda Penchak Sılat boıynsha І respýblıkalyq chempıonat ótti
QARAǴANDY. QazAqparat – Qaraǵandyda alǵash ret respýblıkalyq Penchak Sılat sporttyq jáne jaýyngerlik óner chempıonaty ótti. Jarysqa elimizdiń 10 aımaǵynan kelgen 250-den astam adam qatysty, dep habarlaıdy QazAqparat tilshisi.
22-24 qarasha kúnderi Qaraǵandy qalasynda Penchak Sılat boıynsha Qazaqstan Respýblıkasynyń 1-shi chempıonaty ótti. Sport túri retinde Penchak Sılattyń Qazaqstanda resmı túrde osy jyly ǵana tirkelgenine qaramastan, bul chempıonat elimizdiń 10 aımaǵynan ókilder jınaı aldy. 257 qatysýshy osy kóne, al Qazaqstan úshin - jańa jaýyngerlik óner túrinde óz sheberlikteri men jigerlerin kórsetti. Dodada 8-den 35 jasqa deıingi qatysýshylar ózara baq talastyrdy.
Osy jarystarda Penchak Sılat tórt baǵytynyń 3 bólimi usynyldy: Týngal ( jeke óner kórsetý) Tandıng ( eki sportshynyń jekpe-jegi) jáne Regý (toptyq óner kórsetý). QR Mádenıet jáne sport mınıstrligi Sport komıtetiniń tóraǵasy, Olımpıada chempıony Serik Sápıev sportshylardy jarystyń bastalýymen quttyqtap, qatysýshylarǵa tabys tiledi.
«Qaýymdastyq aldaǵy ýaqytta da QR-da Penchak jekpe-jegin alǵa jyljytý úshin barynsha kúsh jumsaıtyn bolady. «Qazaqstan Respýblıkasynyń Sılat Penchak qaýymdastyǵy» zańdy tulǵalar birlestigi Qazaqstanda jańa sport túrin taný boıynsha barlyq protsedýralardan ótti. Atap aıtqanda, Ulttyq Olımpıada komıtetimen maquldandy jáne osy jyldyń qazan aıynda Sport mınıstrliginde tirkeldi. Biz Azııa chempıonatyna irikteý maqsatynda respýblıkanyń birinshi chempıonatyn ótkizýdi sheshtik», - deıdi QR Sılat Penchak qaýymdastyǵynyń vıtse-prezıdenti Medet Ábjanov.
Chempıonattyń ashylý saltanatyna Qazaqstandaǵy Indonezııa elshisi Rahmat Pramono myrza qatysty. Ol atalmysh sharanyń halyqaralyq mańyzdylyǵyn atap ótti.
«Qazaqstan respýblıkasyndaǵy Penchak Sılat qaýymdastyǵynyń jumys isteı bastaǵanyna kóp ýaqyt bolmaǵanymen, bizdiń ulttyq jaýyngerlik óner túriniń kóptegen jankúıerleri bar ekenin kórý úlken qýanysh. Sportshylardyń jasy da ártúrli - eń kishkentaılardan bastap eresekterge deıin. Bul dostyq qarym-qatynastardyń tereńdeýine, sondaı-aq Ońtústik-Shyǵys Azııa elderi arasynda Qazaqstannyń bedeliniń ósýine yqpal etedi. Sonymen qatar QR-da Penchak Sılattyń tanymaldyǵynyń artqanyn kórsetedi», - dep atap ótti Elshi.
Úsh kúndik jarystyń nátıjesi boıynsha komandalyq esepte Qaraǵandy oblysynyń sportshylary birinshi oryndy ıelendi. Ekinshi oryn Almaty oblysynyń komandasyna buıyrdy. Úzdik úshtikti Aqtóbe oblysynyń sportshylary túıindedi.
Aıta ketken jón, Sılat jekpe-jegi Malaı arhıpelagynda VII ǵasyrdan beri tanymal. Ol Sýmatra men Malakk túbeginiń jaǵalaýyn mekendeıtin malaılyqtardyń jaýyngerlik óneriniń asa kórnekti túri bolyp sanalady. Sılattyń negizgi elementteri passang (bastapqy jaǵdaıy jáne sálemdesý), langka (oryn aýystyrý), djýrýs (tásilder) bolyp tabylady. Olardyń kóptegen úılesimderi býngo (gúl) nemese kembangan, al jaýyngerlik qoldaný býah (jemis) dep atalady. Syrtqy tartymdy jáne tipti dástúrli bı qozǵalystarynyń (býngo) bolýy, olardyń artynda aýyr jaýyngerlik tásilder (býah) jasyrylǵan, basqa shyǵys jaýyngerlik ónerinen erekshelenetin penchak-sılattyń tán belgisi bolyp tabylady.
Eske sala ketsek, buǵan deıin QR Ulttyq Olımpıada komıtetiniń bul jaýyngerlik ónerdiń jańa túrin tirkegendigin habarlaǵan bolatynbyz.
