Qaraǵandyda patron zaýyty iske qosyldy
QARAǴANDY. QazAqparat - Qaraǵandy oblysynda «Steel Manufacturing» JShS patron zaýyty jumysyn bastady.
Birinshi kezekti iske qosý QR Premer-Mınıstri Asqar Mamınniń qatysýymen ótti. Óńirge jumys sapary barysynda Úkimet basshysy «Saryarqa» erkin ekonomıkalyq aýmaǵynda bolyp, óndiris barysymen tanysty, dep habarlaıdy QazAqparat tilshisi.
Patron zaýytynda tapansha jelisi iske qosyldy. Jyl sońyna deıin avtomatty jelini iske qosý josparlanyp otyr.
Jobanyń quny – 28,1 mlrd teńge, kásiporynda 164 jańa jumys orny ashylady dep kútilýde.
Patrondardy shyǵarý úshin zamanaýı tehnologııalar qoldanylatyny jáne TMD aýmaǵynda mundaı zaýyttyń balamasy joq ekeni atalyp ótti. Ónerkásiptik ınternet zattar engizilýimen munda óndiris tolyǵymen avtomattandyrylǵan.
Zaýyttyń jobalyq qýaty jylyna 30 mln dana patronǵa eseptelgen.
Indýstrııa jáne ınfraqurylymdyq damý vıtse-mınıstri Talǵat Janjúmenovtyń aıtýynsha, qorǵanys tapsyrysy aıasynda eldiń Qarýly Kúshterine oq-dári jetkizýge kelisimshart jasalǵan.
«Qazaqstanda alǵash ret túrli nomenklatýradaǵy oq-dárilerdiń arnaıy óndirisi ashylady. Bul biregeı zaýyt, ol kanadalyq kompanııanyń eń zamanaýı qurylǵylarymen jabdyqtalǵan. Barlyq mamandar Kanadada oqýdan ótti. Zaýyt ishki naryqtyń qajettiligin ǵana emes, sonymen qatar eksportqa ónim jetkizý múmkindigin de qamtamasyz etedi», - dedi vıtse-mınıstr.
Asqar Mamın sondaı-aq «Seven Refractories Asia» JShS-niń otqa tózimdi materıaldar shyǵaratyn zaýytyn aralap kórdi. Jobaǵa sheteldik kompanııalar qatysqan. Investıtsııa 1,7 mlrd teńgeni qurady. 70 jumys orny quryldy. Mamandar Eýropada oqýdan ótken.
Óndiristik qýaty jylyna 38 myń tonna ónim shyǵarýǵa qaýqarly. Zaýyt eksportqa baǵyttalǵan. Ónimniń negizgi kólemi Reseı men Qyrǵyzstanǵa jetkiziledi. Otandyq otqa tózimdi materıaldar ishki naryqqa da jiberiledi. Іri tutynýshylardyń biri – «ArselorMıttal Temirtaý» AQ.
Qaraǵandylyq «Saryarqa» EEA shamamen 600 ga aýmaqty alady. Infraqurylymdy qurýǵa 25 mlrd teńgeden astam qarjy baǵyttaldy.
