Qaraǵandyda páter órtinen bala men 2 áıel kóz jumdy
ASTANA. QazAqparat - Qaraǵandy qalasynda turǵyn úıden órt shyǵyp, úsh adam mert boldy, dep habarlaıdy QazAqparat QR ІІM Tótenshe jaǵdaılar komıtetine silteme jasap.
«13 qarasha kúni saǵat 18:00-de órtke qarsy qyzmet pýltine Qaraǵandy qalasy Oktıabr aýdany Bagrıtskıı kóshesindegi turǵyn úı páterindegi órt týraly habar kelip tústi. Ot jalyny qospáterli turǵyn úıdiń bir bóliginde 70 sharshy metr aýmaqty qamtyǵan, saldarynan úı shatyry qıraǵan», - dedi QR ІІM Tótenshe jaǵdaılar komıtetiniń resmı ókili Nursultan Nurahmetov.
Resmı ókildiń habarlaýynsha, oqıǵa ornynan 1962 jáne 1990 jyly týǵan eki áıeldiń jáne 2012 jyly týǵan balanyń máıiti tabyldy.
Kórshiles páterden eki adam evakýatsııalandy, onyń bireýi bala.
Tilsiz jaý saǵat 20:35-te aýyzdyqtalyp jáne 20:49-da tolyq sóndirildi.Ony sóndirýge Qaraǵandy oblystyq TJD jeke quramynan 24 adam jáne 4 tehnıka jumyldyryldy.
Órt sebepteri anyqtalyp jatyr.
