Qaraǵandyda paramen ustalǵan TJD basshysynyń orynbasaryna sot úkimi shyqpady
QARAǴANDY. QazAqparat - 2017 jyldyń 4 sáýiri kúni paramen ustalǵan Qaraǵandy oblystyq Tótenshe jaǵdaılar departamenti basshysynyń orynbasary Vadım Magamadovqa qatysty búgin jarııa etilýi tıis bolǵan úkim - shyqpady, dep habarlaıdy QazAqparat tilshisi.
Aıta keteıik, Vadım Magamadov alǵan 200 myń teńge parany 12 mıllıon teńge kóleminde aıyppul retinde tóleýge kelisim bergen bolatyn.
Sýdıa Jumaǵul Shújenov kináni moıyndaý týraly protsessýaldyq kelisimde birqatar qatelikter men kemshilikterdiń oryn alǵandyǵyn anyqtady.
Atap aıtqanda, prokýror men sottalýshy para somasynan 60 ese kóleminde aıyppul tóleý túrinde jazany óteý týraly kelisken. Aıyppul 12 mıllıon teńgeni quraıdy. Zańǵa sáıkes, eger Magamadov aıyppuldy memleketke erikti túrde tólemese, prokýror ony bas bostandyǵynan aıyrý jazasymen almastyrý máselesin kótere alady.
Alaıda sýdıa joǵaryda atalǵan qylmysqa qatysty úkimdi shyǵarý protsessýaldyq kelisimde jiberilgen qatelikke baılanysty múmkin bolmaıtyndyǵyn habarlady.
Prokýror qujatta Magamadovty azamattyq qorǵanys polkovnıgi dep kórsetken. Durysy azamatyq qorǵaý polkovnıgi. Sondaı-aq protsessýaldyq kelisimde qosymsha jaza túrlerin taǵaıyndaý týraly aqparattar kórsetilmegen eken.
«Jiberilgen qatelikterge baılanysty sot qylmystyq isti jańa protsessýaldyq kelisim jasaý úshin prokýrorǵa keri qaıtarýǵa sheshim shyǵardy»,- dedi sýdıa Jumaǵul Shújenov.
Eske sala keteıik, QR Jemqorlyqqa qarsy is-qımyl ulttyq bıýrosynyń Qaraǵandy oblystyq departamenti QR ІІM Tótenshe jaǵdaılar komıtetiniń oblystyq departamenti bastyǵynyń orynbasary, azamattyq qorǵaý polkovnıgi V.Magamadovty ustaǵan bolatyn. Ulttyq bıýro baspasóz qyzmetiniń habarlaýynsha, Magamadov kásipkerlik sýbektilerinde anyqtalǵan órt qaýipsizdigi erejeleriniń buzýshylyqtary úshin aıyppuldardyń somasyn zańsyz tómendetip otyrǵan, sonymen birge uıǵarymdardyń oryndalý merzimin sozǵany úshin zańsyz syıaqy alǵan.
