Qaraǵandyda paramen ustalǵan «Qazaqavtojoldyń» basshylary tergeý ızolıatorynan bosatylmady
QARAǴANDY. QazAqparat - 17 mıllıon teńge para alǵany úshin qamalǵan «Qazaqavtojol» RMK Qaraǵandy bólimshesiniń basshysy Ǵadil Muqanov pen onyń orynbasary Erjan Otarovty tergeý oqshaýlaǵyshynan bosatýǵa ruqsat etilmedi, dep habarlaıdy «QazAqparat» HAA tilshisi.
Sondaı-aq, «Aqjol DS» Almaty jol-qurylys merdiger kompanııasynyń eki basshysy Muqan Ybyshev pen Bekbolat Jaqparov bosatylmady.
Atalǵan tórt azamat Qaraǵandy oblystyq sot alqasynan «qamaýda ustaý» bultartpaý sharasyn kepil nemese qaladan shyqpaý týraly qolhatqa aýystyrýyn surady. Barlyq tórt ótinishti Qaraǵandy oblystyq sotynyń sýdıasy Qaıyrken Tóleýov qarady. Alaıda, prokýror olardyń tergeý barysyna kedergi keltiretindigin alǵa tartyp, sottan ótinishti qanaǵattandyrmaýyn surady.
«Ǵadil Muqanovtyń apellıatsııalyq ótinishin qanaǵattandyrmaı, birinshi ınstantsııadaǵy sottyń úkimin zańdy dep tabý týraly úkim shyǵaryldy», - dedi oblystyq sottyń qylmystyq ister boıynsha apellıatsııalyq alqasynyń sýdıasy Qaıyrken Tóleýov.
Olar tergeý kezinde tergeý oqshaýlaǵyshynda bolady. Sondaı-aq «Qazaqavtojol» bólimshesi basshysynyń orynbasary Erjan Otarovqa qatysta birneshe atqarý óndirisi ashyldy. Sot belgilegendeı, Otarov qaltaly qaraǵandylyqtardan aqsha alyp, belgilengen merzimde qaıtarmaǵan. Qaryz alý kelisimderi men qolhattardyń arqasynda jábirlenýshiler sotta jeńip shyqty. Qaryzdyń jalpy somasy 31 mıllıon teńgeni quraıdy.
Eske salaıyq, 15 qyrkúıek kúni «Qazaqavtojol» respýblıkalyq memlekettik kásiporynynyń Qaraǵandy oblysyndaǵy fılıaly basshysy men onyń orynbasary almatylyq jol jóndeý fırmasynyń dırektorynan 17 mıllıon teńge kóleminde para aldy dep kúdikpen ustalǵan edi. «Aqjol DS» qurylys kompanııasynyń eki ókili de tutqyndaldy. Sheneýnikter QR QK 366-baby «para alý», al «Aqjol DS» merdiger fırmasynyń jumysshylary 367-bap «para berý» boıynsha aıyptalýda.
