Qaraǵandyda para alǵan sheneýnik memleketke 4 mln. teńge tóleıdi
QARAǴANDY. QazAqparat - Qaraǵandy aýdandyq soty Ulttyq eńbek gıgıenasy ortalyǵynyń dırektoryna para alǵany úshin aıyppul saldy, dep habarlady «QazAqparat» HAA tilshisi.
Qazybek bı aýdandyq sotynyń habarlaýynsha, burynǵy sheneýnik Qanat Saqıev 50 myń teńge para alǵany úshin aıypty dep tanyldy. Ol ekpe úshin eritindi jetkizgenine aqsha aýdarý máselesin jedeldetkeni úshin farmatsevtıkalyq fırma ókilinen aqsha alǵan. Ortalyq býhgalteri taýar úshin tólemdi ýaqtyly aýdarmaǵan. Para berý usynysyn alǵan jetkizýshi fırma ókili sybaılas jemqorlyqqa qarsy ulttyq bıýronyń oblys boıynsha departamentine para bopsalaǵany týraly shaǵymmen júginedi. Ortalyq dırektory aqsha alý ústinde ustaldy.
Sýdıa Jumaǵul Shójenov sottalýshyny para alǵany úshin aıypty dep tanydy, oǵan aıyppul túrinde jaza taǵaıyndady. Sheneýnik óz aıybyn moıyndap, ókinish bildirdi. Ol prokýrormen protsessýaldyq kelisim jasasty.
«Sot úkim etti: sottalýshy para alǵany úshin aıypty dep tanylyp, alǵan aqshanyń 70 ese somasy mólsherinde aıyppul túrinde jaza taǵaıyndalsyn. Múlki tárkilenip, ol qosymsha jaza retinde ómir boıyna memlekettik qyzmette jumys isteý quqyǵynan aıyrylady», - dedi úkimdi oqyǵan sýdıa Jumaǵul Shójenov.
Aıyppuldy óz erkimen tóleý úshin burynǵy sheneýnikke bir aı berildi. Sot prokýratýranyń narazylyǵy boıynsha aıyppuldy bas bostandyǵynan aıyrýǵa aýystyrýǵa quqyly.
