Qaraǵandyda para aldy degen kúdikti sheneýnik sýdıaǵa narazylyq bildirdi
QARAǴANDY. QazAqparat - Qaraǵandy oblysynda bir jarym mıllıon teńge para aldy degen kúdikti Abaı aýdany ákiminiń burynǵy orynbasary Dımash Súleımenov sýdıany ádiletsiz dep, oǵan narazylyq bildirdi, dep habarlaıdy «QazAqparat» HAA.
2017 jylǵy 25 shildede Qaraǵandyda JShS basshysymen kezdesken sheneýnikti artynsha sybaılas jemqorlyqqa qarsy departament qyzmetkerleri ustaǵan. Tergeý nusqasy boıynsha sheneýnik bir jarym mıllıon teńge úshin «Óńirlerdi damytý 2020» memlekettik baǵdarlamasy aıasynda salynǵan nysandaǵy oryndalmaǵan jumystardyń aktisine qol qoıýǵa ýáde bergen.
Qaraǵandyda ótken sot zalynda sýdıaǵa eki ret narazylyq bildirildi. Aldymen Tólegen Tańsyqbaev sýdıa Aıgúl Myrzabekovaǵa onyń ádiletti ekenine senimsizdigin aıtyp, narazylyq bildirdi. Zańǵa sáıkes, narazylyqtyń negizdi ekendigi týraly sheshimdi basqa sýdıa qabyldaýy tıis. Aıgúl Myrzabekova kreslony áriptesine bosatyp berdi. Ol «Sýdıa meniń ótinishterimdi qabyldamaı otyr, sondaı-aq meniń suraqtarym men meniń qorǵaýymdaǵy adamnyń suraqtaryn zańsyz ári dálelsiz alyp tastap jatyr» degen Tańsyqbaevtyń sózin sýdıa Jumaǵul Shújenov qabyldamady. Odan keıin taǵy da tóreshini aýystyrý talabymen narazylyq bildirgen Dımash Súleımenovtiń talaby da qabyldanbady.
Sheneýnik QR Qylmystyq kodeksiniń 366-babynyń («Para alý») 2-bóligine sáıkes aıyptalýda.
