Qaraǵandyda patsıentterge jóndi qyzmet kórsetpeıtin klınıkalar bar
Qaraǵandy oblysynda 108 medıtsınalyq uıym óńir turǵyndaryna medıtsınalyq kómek kórsetedi.
Onyń 52 % – jekemenshik nysan. Qormen shart jasasqan barlyq mekemeler túrli monıtorıngten ótedi, sonyń ishinde turǵyndardan túsken shaǵymdar boıynsha tekseriledi.
«Bizde tekserý kestesi bar. Proaktıvti monıtorıng kezinde ereje buzý faktileri anyqtalǵan jaǵdaıda uıymǵa ony túzetýge ýaqyt beriledi. Eger túzetpese, aıyppul salamyz. Keıbir kemshilikter boıynsha turaqsyzdyq aıybyn esepteý túrindegi sharalar qoldanylady. Bizdiń mindetimiz – medıtsınalyq uıymǵa bólinetin aqshaǵa sapaly medıtsınalyq kómekti qamtamasyz etý jáne osy kómekti qoljetimdi etý», – dep túsindirdi medıtsınalyq saqtandyrý qory Qaraǵandy fılıalynyń dırektory Fazyl Kopobaev.
2022 jyldyń 1 toqsanynda medıtsınalyq saqtandyrý qory anyqtalǵan buzýshylyqtar úshin 300 mln teńgege jýyq somaǵa ekonomıkalyq yqpal etý sharalaryn qabyldady.
Negizgi buzýshylyqtardyń qataryna standarttar jáne dıagnostıka men emdeýdiń klınıkalyq hattamalarynan aýytqý, qujattamanyń durys toltyrylmaýy jatady.
«Medıtsınalyq uıymdar patsıentti TMKKK nemese MÁMS paketinde kózdelgen qyzmet úshin qosymsha aqy tóleýge zańsyz májbúrlegen kezde halyqtan ótinish kelip túsedi. Siz sapasyz medıtsınalyq kómek nemese kómek kórsetýden esh negizsiz bas tartýmen nemese tólemdi talap etý jaǵdaılaryna tap bolǵan kezde júginetin birinshi ınstantsııa – atalmysh uıymnyń patsıentterdi qoldaý qyzmeti. Bul qyzmet máseleni «shuǵyl jáne osy jerde» qaǵıdaty boıynsha sheshýi tıis. QR DSM buıryǵyna sáıkes, bul qyzmet árbir medıtsınalyq uıymda bar. Eger olar eshteńe sheshpese, basshylyqqa, ákimshilikke júginý qajet. Al eger basshylar da eshteńe sheshpese – Densaýlyq saqtaý basqarmasyna nemese tikeleı medıtsınalyq saqtandyrý qoryna qońyraý shalyńyz. Bizde osymen úshinshi jyl qatarynan 1406 baılanys ortalyǵy jumys isteıdi. Sonymen qatar, bizde keri baılanystyń basqa da kóptegen arnalary bar: Qoldau 24/7 mobıldi qosymshasy, fms.kz saıty, @SaqtandyryBot atty telegramm-bot bar», – deıdi Fazyl Kopobaev.
