Qaraǵandyda oıyn alańynda kóz jumǵan qyzdyń tynys joldary bitelip qalǵan
QARAǴANDY. QazAqparat - Dárigerler oıyn alańynda qaıtys bolǵan bala neden kóz jumǵanyn málimdedi, dep habarlaıdy QazAqparat tilshisi.
Qaraǵandy oblysy Densaýlyq saqtaý basqarmasynyń ókilderi oıyn alańynda qaıtys bolǵan 7 jasar qyzdyń óliminiń aldyn ala sebebin jarııalady.
«Keshe, 11 maýsymda saǵat 18:22-de «Taır» saýda úıinen jedel járdem shaqyrý qońyraýy kelip tústi. Onda oınap júrgen balalardyń biri es-tússiz qulaǵany týraly aıtyldy. Jedel járdem brıgadasy 11 mınýtta, saǵat 18:33-te oqıǵa ornyna keldi. Oıyn aımaǵynda klınıkalyq ólim belgileri bar 2012 jyly týǵan bala tabyldy. Dereý reanımatsııalyq sharalar qabyldandy. Ókinishke qaraı, ótkizilgen is-sharalar nátıje bermedi. Bıologııalyq ólim anyqtaldy. Sebebin anyqtaý úshin sot-medıtsınalyq saraptama taǵaıyndaldy. Búgingi tańda aldyn ala derekter boıynsha ólim sebebi - tynys alý joldarynyń asfıksııasy ekenin málimdeımiz», - dep habarlady Qaraǵandy oblysy Densaýlyq saqtaý basqarmasy basshysy orynbasarynyń mindetin atqarýshy Gamal Toqsanbaev.
Óńirlik Kásipkerler palatasynda habarlaǵandaı, saýda úıindegi oıyn aımaǵy men attraktsıondar barlyq normalarǵa saı. Jáne kásipker tarapynan eshqandaı zańbuzýshylyq bolmaǵan. Saýda úıiniń ákimshisi aıtqandaı, olar balanyń ómirin qutqarýǵa barynsha tyrysqan.
«Iá, shynymen de bala bizdiń attraktsıonda boldy. Qyz bala átkenshekte oınap júrgen edi. Bul átkenshekter bıik emes jáne tómengi jaǵynda qaýipsiz jabyn tóselgen. Ony úlken ápkesi oınatyp otyrǵan. Sodan keıin qyz esinen tanyp qulady. Ápkesi aıqaılap, kómekke shaqyra bastady. Birden qyzmetkerler de, balanyń anasy da júgirip baryp, alǵashqy medıtsınalyq kómek kórsete bastady. Osy ýaqytta biz «jedel járdemdi» shaqyrdyq. Jedel járdem kelgenge deıin qyz balaǵa jasandy tynys alý sharalaryn jasadyq», - deıdi saýda úıiniń ákimshisi.
Esterińizge sala keteıik, keshe Qaraǵandy saýda úıleriniń birinde 7 jasar bala oıyn alańynda kóz jumǵan bolatyn. Qazirgi ýaqytta tıisti saraptamalar júrgizilýde.
