Qaraǵandyda oıyn alańdaryn abattandyrýǵa baqylaý kúsheıtildi
QARAǴANDY. QazAqparat – Bıyl Qaraǵandyda balalar alańdaryn ornatý kezinde sapaǵa basa nazar aýdaryldy. Ótken jyldardyń monıtorıngi merdigerden jumysty jaýapkershilikpen oryndaýdy talap etetin ýaqyt kelgenin kórsetti, dep habarlaıdy QazAqparat tilshisi.
Qazybek bı atyndaǵy aýdanda 14 aýla abattandyrylady, al Álıhan Bókeıhan aýdanynda 5 fýtbol alańy salynyp, 12 aýla keshendi túrde jabdyqtalady.
Sonymen qatar, Kúngeı jáne Úlken Mıhaılovka sııaqty salystyrmaly túrde shalǵaı aýdandarda 17 balalar oıyn alańy paıda bolady.
Ótken jyly alańdardyń sapasyz ornatylýyna qatysty halyq tarapynan aıtylǵan synmen sheneýnikter kelisedi. Olar merdigerlerden kemshilikterdi joıýyn talap etti. Bul jaǵdaıda sotqa júginýge týra kelgen kompanııalar da bar.
«Qazir sapaǵa kóp kóńil bólemiz, merdigerlerden oıyn alańdary úshin jaqsy elementter satyp alýdy talap etemiz. Aýladaǵy keshendi jumysqa keletin bolsaq, munda bári bolady: fýtbol alańy, eki oıyn alańy (3–7 jáne 7–12 jas), vorkaýt-alań, eki kúrkeler, qumsalǵysh ornatylady. Kontýr boıymen merdiger kompanııa tósem tósep, jıekter men asfaltty aýystyrady», – deıdi Qazybek bı atyndaǵy aýdan ákiminiń orynbasary Maqsut Qojanov.
Qazybek bı atyndaǵy aýdandaǵy 13 aýla aýmaǵyn abattandyryp jatqan kompanııa ókili Aslan Imanjanov olardyń jumysyna qaraǵandylyqtarda shaǵymdar bolmaıtynyna sendirdi.
«Biz bul salada 15 jyl jumys istep kelemiz. Kem degende bir jylǵa kepildik beremiz, sonymen qatar ár attraktsıonǵa kepildik beremiz. Olardyń barlyǵy standarttarǵa, QNjE, GOST-qa sáıkes keledi. Shaǵyn sáýlet nysandaryna 5 jyldan astam kepildik beremiz. Qazaqstan naryǵynda eń joǵary sapaly materıaldardy paıdalanamyz. Biz jasandy shópti rezeńke úgindisimen (qulaǵan kezde soqqylardy jumsartý úshin) jáne kvarts qumymen jabamyz. Sonymen qatar, biz kógaldardy arnaıy plastıkalyq shegelermen nyǵaıtamyz», – deıdi Aslan Imanjanov.
Keıbir aýla aýmaqtaryn abattandyrý 10 shildege deıin aıaqtalady, qalǵanyn merdigerler jazdyń sońynda tapsyramyz dep ýáde berip otyr.
Qaraǵandyda jol jumystary qyzý júrip jatyr. Qalada barlyǵy 32 joba boıynsha joldardy ortasha jóndeý júrgizilýde.
Táttimbet kóshesi men Shahterler dańǵylynyń qıylysynda asfaltbetonnyń joǵarǵy qabaty aýystyryldy. «Magným» SÚ aýmaǵynan oń jaqty shyǵys joly uıymdastyrylady. Sonymen qatar oblystyq balalar aýrýhanasyna aparatyn joldyń 900 metrine jóndeý jumystary júrip jatyr. Bıyl medıtsınalyq mekeme paıdalanýǵa beriledi.
7-shi magıstral boıynsha avtomobıl jolyna kúrdeli jóndeý jalǵasýda, K.Marks kóshesi boıynsha a/j qıylysynda jumystar júrgizilýde. Qazir jol negizi sebilip jatyr.
Karl Marks kóshesi – HMK kópiri jolyndaǵy jumystar 70 paıyzǵa daıyn. Mindet – 15 shildege deıin jolaqtardy ashý.
Sonymen qatar Maıqudyqtaǵy saıabaqta da bıyl qaıta qurý jumystary bastaldy.
«14 gektardy abattandyramyz. Uzyndyǵy 2,5 shaqyrym velojol, 1,2 shaqyrym jaıaý júrginshiler joly, 1,2 shaqyrym júgirý joly, rotondasy bar qurǵaq sýburqaq bolady. Bıyl jumystardy aıaqtaýdy josparlap otyrmyz», – deıdi merdigerlik kompanııa ókili Vladımır Nefedov.
Merdigerler sonymen qatar jasyl alańdarǵa qamqorlyq jasap, qosymsha kópjyldyq gúlder men butalar otyrǵyzýǵa ýáde berip otyr.
