Qaraǵandyda ótken jartylaı marafonǵa 6 myńnan astam adam qatysty
QARAǴANDY. QazAqparat - Qaraǵandyda úshinshi ret Armanga jol jartylaı marafony ótti, dep habarlaıda QazAqparat tilshisi.
21 shaqyrym qashyqtyqta Qazaqstan, Reseı, Qyrǵyzstan jáne Belarýs elderiniń áýesqoı jáne tájirıbeli marafonshylary júgirdi.
Qaraǵandy oblysynyń ákimi Erlan Qoshanov Armana jol bas júgirisin bastap berdi.
Marapattaý barysynda sport merekesiniń qonaǵy - aty ańyzǵa aınalǵan sýpermarafonshy Marat Jylanbaev basty jeńimpazdardy marapattady. Álemniń barlyq úlken shólderinde júgirip ótken rekordsmenniń qolynan 14 jáne 21 shaqyrym qashyqtyqqa júgirgender medaldar aldy.
«Men júgirý elshisi retinde búkil Qazaqstan boıynsha marafondardy ashamyn. Qaraǵandy jartylaı marafonyna úshinshi ret kelip otyrmyn. Meniń týǵan jerimde osy jańa baǵyt damyp, odan ári qanat jaıyp kele jatqanyna qýanyshtymyn. Qaraǵandy «Jasampaz» júgirý klýbynyń arqasynda árdaıym marafonshylarymen tanymal bolǵan. Men búkil álemge áıgili qaraǵandylyq Pavel Sırotınniń shákirtimin. Búgin de Qaraǵandy elimizdiń eń júgirýshi qalalarynyń qataryna kirdi dep senimmen aıtýǵa bolady. Birinshi oryndy Almaty, ekinshi oryndy elordamyz ıelenedi. Úshinshi oryn úshin Qaraǵandy men Atyraý kúresýde», - dep atap ótti Marat Jylanbaev.
Onyń aıtýynsha, jeksenbi kúngi salqyn aýa raıy júgirýshilerge septigin tıgizdi. Marafondar úshin 10 gradýs jylylyq qolaıly temperatýra bolyp sanalady.
Jartylaı marafon baǵdarlamasyna alǵash ret skandınavtik júrý kirdi. Jeti shaqyrymdyq qashyqtyqta zeınetkerler kúshterin synap kórdi. Jarysqa qatysqan júgirýshilerdiń arasynda eń egdesi 82 jastaǵy qaraǵandylyq Taısııa Zaıtseva boldy.
Eń kishkentaı qatysýshy 5 jasar búldirshin boldy. Ol óziniń 8 jasar aǵasyn qoldaýǵa kelip, onymen birge tirkelmeı, eki shaqyrym júgirip ótti.
«Dostyq» júgirisine balalar úıiniń uldary qatysty. Kóptegen sportshylar qaraǵandylyq jartylaı marafonyna birneshe ret qatysqan. Kóbisi ótken jylǵy nátıjesin jaqsartý úshin jyl boıy daıyndalyp kelgen eken. Nur-Sultan qalasynan kelgen jeńil atletıka boıynsha jattyqtyrýshy Qudaıbergen Zeınollaev úsh jyl buryn 10 shaqyrym qashyqtyqta chempıon atanǵan bolatyn. Ótken jyly ol úzdikter qataryna iline almaı qaldy, alaıda bıyl 7 shaqyrymdyq «Dostyq» dıstantsııasynda jeńimpaz atandy.
«Spýtnık» júgirisiniń áıelder arasyndaǵy jeńimpazy 72 jasar Amegúlsin Musylmanovanyń bul 105-shi marafony eken.
Jartylaı marafonnyń bas júldesi - mıllıon teńge sheteldik sportshylarǵa buıyrdy. Ekinshi jyl qatarynan Gomelden kelgen Vladıslav Prıamov Armanǵa jol chempıony atanyp otyr. Trassada ol qazaqstandyq Mıhaıl Krasılovpen birdeı júgirdi, alaıda máre syzyǵynda Belarýs marafonshysy qarsylasyn 7 sekýndqa buryn keldi. 21 shaqyrymǵa júgirýde áıelder arasynda Bishkekten kelgen Darıa Maslova kósh bastady.
Jartylaı marafonnyń jalpy júlde qory - 8 mln teńge.
Barlyq nátıjelermen tolyǵyraq qaragandy-marathon.kz saıtynda tanysýǵa bolady.
